خمار بارہ بنکوی :::: ہزار رنج سر آنکھوں پہ بات ہی کیا ہے

[طارق شاہ]

غزلِ
خُمار بارہ بنکوی

ہزار رنج سر آنکھوں پہ بات ہی کیا ہے
تِری خوشی کے تصدّق، مِری خوشی کیا ہے

خُدا بچائے تِری مست مست آنکھوں سے
فرشتہ ہو تو بہک جائے، آدمی کیا ہے

گزُار دُوں تِرے غم میں، جو عمرِ خضرمِلے
تِرے نِثار، یہ دو دِن کی زندگی کیا ہے

بَھری بہار کہاں، اور قفس کہاں صیّاد
سمجھ میں آج یہ آیا، کہ بے بَسی کیا ہے

وہ اور ہیں جو طلب گارِ خُلد ہیں واعظ
نگاہِ یار سلامت، مُجھے کمی کیا ہے

کھڑے ہوئے ہیں وہ کب سے نظر جُھکائے ہُوئے
خمار ہوش میں آؤ، یہ بے خُودی کیا ہے

خمار بارہ بنکوی​