گلکاریء خونِ دل سے، زمیں صحرا کی گلستاں کون کرے - وزیر الحسن

[کاشفی]

غزل
(وزیر الحسن)
گلکاریء خونِ دل سے، زمیں صحرا کی گلستاں کون کرے
ہے سرِّ عیاں رازِ رگِ جاں، تشریح رگِ جاں کون کرے

اس دل کو کوئی کیا شاد کرے، ہوں جس میں ہزاروں ویرانے
اک گھر ہو اُسے آباد کریں، تعمیرِ بیاباں کون کرے

ہم دورِ خزاں میں بھول چکے، آداب و رسومِ موسمِ گل
اب موسمِ گل کی آمد پر تعظیمِ بہاراں کون کرے

جب دل تھا اسیرِ شعلہء غم، تھی کوششِ آہ و نالہ بجا
اب کیا ہے غمِ پنہاں کے سوا، عرضِ غمِ پنہاں کون کرے

اب دورِ طرب تکلیف نہ کر، دن بیت گئے اُمیدوں کے
محفل میں چراغاں ہو نہ سکا، مدفن پہ چراغاں کون کرے

محتاجِ وفا ہیں اہلِ جہاں پھر جنسِ وفا کیوں عام نہیں
ہر وقت ہے قدرِ جنسِ وفا، اس جنس کو ارزاں کون کرے

آغازِ نمودِ غم سے حسن آہوں کو ملی ہے وسعتِ دل
اس تنگ فضا کی دنیا میں آہوں کو پریشاں کون کرے​