طارق شاہ
محفلین
غزل
مرزا اسداللہ خاں غالب
گر نہ اندوہِ شبِ فُرقت بیاں ہوجائیگا
بے تکلّف داغِ مہہ، مُہرِ دَہاں ہوجائیگا
زہرہ گر ایسا ہی شامِ ہجْرمیں ہوتا ہے آب
پرتوِ مہتاب، سیلِ خانماں ہو جائیگا
لے تو لُوں سوتے میں اُس کے پانْو کا بوسہ مگر
ایسی باتوں سے وہ کافر بدگماں ہوجائیگا
دل کو ہم صرفِ وفا سمجھے تھے، کیا معلوم تھا
یعنی یہ پہلے ہی نذرِامتحاں ہو جائیگا
سب کے دل میں ہے جگہ تیری، جو تو راضی ہوا
مجھ پہ، گویا اک زمانہ مہرباں ہوجائیگا
گر نگاہِ گرم فرماتی رہی تعلیمِ ضبط
شعلہ خس میں، جیسے خوں رگ میں نہاں ہوجائیگا
باغ میں مجھ کو نہ لے جا، ورنہ میرے حال پر
ہر گُلِ تر، ایک چشمِ خوں فشاں ہوجائیگا
وائے! گر میرا تِرا انصاف محشر میں نہ ہو
اب تلک تو یہ توقّع ہے کہ واں ہوجائیگا
فائدہ کیا، سوچ، آخر تُو بھی دانا ہے، اسد
دوستی ناداں کی ہے، جی کا زیاں ہوجائیگا
اسداللہ خاں غالب