ناسخ کچھ عدم کا بھی خیال اے دل تجھے یاں چاہیے - امام بخش ناسخ

حسان خان نے 'پسندیدہ کلام' کی ذیل میں اس موضوع کا آغاز کیا، ‏جون 17, 2013

  1. حسان خان

    حسان خان لائبریرین

    مراسلے:
    17,752
    جھنڈا:
    Pakistan
    موڈ:
    Bookworm
    کچھ عدم کا بھی خیال اے دل تجھے یاں چاہیے
    گو عزیزِ مصر ہے پر یادِ کنعاں چاہیے
    کوچۂ دلدار کی حسرت میں رونے کے لیے
    پاؤں کو اب آبلے کی چشمِ گریاں چاہیے
    حشر برپا کر رہی ہے ناقۂ لیلیٰ کی چال
    صورِ اسرافیل اب جائے حدی خواں چاہیے
    چاک رکھتا ہوں جو وحشت میں گریباں مثلِ صبح
    اک پری رو غیرتِ خورشیدِ تاباں چاہیے
    غل مری زنجیر کا پہونچا تو وہ کہنے لگا
    خانۂ زنجیر کو بھی اب نگہباں چاہیے
    میرے غل میں رو کے عالم کو کرے گا اب وہ قتل
    اشک کیسی ناوکِ مژگاں کو پیکاں چاہیے
    ہوں وہ مجنوں عہدِ طفلی میں مجھے کہتے تھے لوگ
    گوشۂ زنداں اسے جائے دبستاں چاہیے
    استلامِ سنگِ اسود سے مجھے کیا زاہدا
    بوسۂ خالِ تہِ ابروئے جاناں چاہیے
    دمبدم کہتی ہے میری کشتیِ عمرِ رواں
    مجھ کو آبِ خنجرِ قاتل کا طوفاں چاہیے
    آ گیا پیری میں اُس کے بوسۂ لب کا خیال
    ہونٹھ کاٹوں کس طرح حسرت سے دنداں چاہیے
    پنجۂ خورشید کو کافی ہے اک جیبِ سحر
    روز یاں دستِ جنوں کو سو گریباں چاہیے
    حسرتِ نظارۂ زلفِ پریشاں دل میں ہے
    بہرِ تسکیں گور میں کچھ مارِ پیچاں چاہیے
    عمر گذری روتے روتے ہنس بھی لوں اب جی میں ہے
    میرے منہ پر کوئی قاتل زخمِ خنداں چاہیے
    سنگریزے لے چلوں چن چن کے بہرِ کودکاں
    عاریت اے کوہ مجھ وحشی کو داماں چاہیے
    روحِ سعدی ہو گئی ہو گی خوشی سے باغ باغ
    آج پڑھنے کے لیے اُس کو گلستاں چاہیے
    طالبِ دنیا مونث ہیں بھلا کیا اُن سے کام
    مرد ہے ناسخ تو عشقِ شاہِ مرداں چاہیے
    (امام بخش ناسخ)
     
    • پسندیدہ پسندیدہ × 1
    • زبردست زبردست × 1
  2. الف عین

    الف عین لائبریرین

    مراسلے:
    33,866
    جھنڈا:
    India
    موڈ:
    Psychedelic
    بہت خوب۔ ناسخ کا کتنا کلام اور کرنے کا ارادہ ہے کیا؟ ایک مزید ای بک حسان خان کے نام
     
    • زبردست زبردست × 1
  3. حسان خان

    حسان خان لائبریرین

    مراسلے:
    17,752
    جھنڈا:
    Pakistan
    موڈ:
    Bookworm
    ابھی میں ناسخ کا تھوڑا اور کلام پوسٹ کروں گا۔ اُس کے بعد ای بک بنا لیجیے گا۔ :)
     
    • پسندیدہ پسندیدہ × 1

اس صفحے کی تشہیر