کرشمے حسن کے پنہاں تھے شاید رقص بسمل میں

[راہب]

ترے جلوں کے آگے ہمت شرح و بیاں رکھ دی
زبان بے نگہ رکھ دی نگاہ بے زبان رکھ دی

مٹی جاتی تھی بلبل جلوہ گل ہائے رنگیں پر
چھپا کر کس نے ان پردوں میں برق آشیاں رکھ دی

نیاز عشق کو سمجھا ہے کیا اے واعظ ناداں !
ہزاروں بن گئے کعبے جبیں میں نے جہاں رکھ دی

قفس کی یاد میں یہ اضطراب دل، معاذ اللہ !
کہ میں نے توڑ کر ایک ایک شاخ آشیاں رکھ دی

کرشمے حسن کے پنہاں تھے شاید رقص بسمل میں
بہت کچھ سوچ کرظالم نے تیغ خوں فشاں رکھ دی

الٰہی ! کیا کیا تو نے کہ عالم میں تلاطم ہے
غضب کی ایک مشت خاک زیر آسماں رکھ دی

 

[شمشاد]

بہت اچھا کلام ہے۔ صاحب کلام کون ہیں؟

 

[الف عین]

مجھے خیال آ رہا ہے کہ ایک آدھ شعر اس کا میں نے کہیں سیماب اکبر آبادی کے نام سے پڑھا تھا کہیں۔

 

[ابوشامل]

نیاز عشق کو سمجھا ہے کیا اے واعظ ناداں !
ہزاروں بن گئے کعبے جبیں میں نے جہاں رکھ دی

سبحان اللہ! بہت خوب۔ شاعر؟؟

 

[محمد وارث]

شکریہ جناب خوبصورت غزل شیئر کرنے کیلیئے

 

[فرخ منظور]

بہت ہی خوبصورت غزل ہے - راہب آج کل تو آپ کمال کا کلام پوسٹ کر رہے ہیں - اگر شاعر کا نام بھی بتا دیتے تو اچھا ہوتا -

 

[محمداحمد]

بہت عمدہ غزل ہے جناب، بہت شکریہ اسے پیش کرنے کے لیے

 

[راہب]

یہ غزل بھی اصغر گونڈوی مرحوم کی ہے