ٹوٹ بٹوٹ کی کہانی - صوفی تبسّم

[فرخ منظور]

ٹوٹ بٹوٹ کی کہانی

چھوٹی سی ایک کہانی ہے
لیکن وہ بڑی پرانی ہے

ملتان کے پاس اِک بستی تھی
بستی میں خلقت بستی تھی

اس بستی میں جو رہتے تھے
سب اس کو نگری کہتے تھے

اس نگری میں سب نائی تھے
سب ٹوٹ بٹوٹ کے بھائی تھے

کوئی کہیں کا رہنے والا ہو
کوئی گورا ہو یا کالا ہو

وہ لمبے ہوں یا چھوٹے ہوں
وہ دبلے ہوں یا موٹے ہوں

یاں جتنے لوگ بھی آتے تھے
یہ نائی انہیں ڈراتے تھے

ہم اس بستی کے نائی ہیں
ہم ٹوٹ بٹوٹ کے بھائی ہیں

اس نگری کا اک راجا تھا
راجے کا نام سماجا تھا

سب نائی اُس کے پاس گئے
اور جا کر اُس سے کہنے لگے

یا سر کے بال کٹا لو تم
یا ڈاڑھی مونچھ منڈا لو تُم

یہ بات سنی جب راجے نے
نگری کے مور سماجے نے

سنتے ہی راجا بول اٹھا
وہ سوُر سماجا بول اٹھا

تُم ٹوٹ بٹوٹ کے بھائی ہو
میں راجا ہوں، تم نائی ہو

میں سب کی صفائی کردوں گا
میں ختم یہ نائی کر دوں گا

یہ سن کر سارے بھاگ گئے
سب ڈر کے مارے بھاگ گئے

اب شہر میں خالی راجا ہے
راجے کا نام اب تاجا ہے


از صوفی غلام مصطفیٰ تبسّم​

 

[فاتح]

واہ واہ واہ۔۔۔ یہ تو کچھ سنی سنی دیکھی دیکھی سی کہانی لگتی ہے
اب شہر میں خالی راجا ہے
راجے کا نام اب تاجا ہے

 

[فرخ منظور]

واہ واہ واہ۔۔۔ یہ تو کچھ سنی سنی دیکھی دیکھی سی کہانی لگتی ہے
اب شہر میں خالی راجا ہے
راجے کا نام اب تاجا ہے

یہ پاکستان کی ہی کہانی ہے۔ یہاں کے راجا نے ہمیشہ ایسا کیا اور راجا سے تاجا ہوگیا۔

 

[ابن سعید]

صوفی صاحب کے کلام کے آگے زبان گنگ ہے۔