ٹوٹ بٹوٹ کرے کیا یار۔ صوفی تبسّم

[فرخ منظور]

ٹوٹ بٹوٹ کرے کیا یار

ٹوٹ بٹوٹ کرے کیا یار
ٹوٹ بٹوٹ کے چوہے چار

ٹوٹ بٹوٹ کی دو بہنیں ہیں
ہر اک بہن بڑی ہُشیار
ہر اِک کے ہے پاس اِک چوہا
ٹوٹ بٹوٹ کے پاس ہیں چار
ٹوٹ بٹوٹ کرے کیا یار
ٹوٹ بٹوٹ کے چوہے چار

اِک پہنے ہے اچکن کالی
اِک پہنے ہے بنیان ہی خالی
اِک پھرتا ہے ننگے پاؤں
اِک کے سر پر ہے دستار
ٹوٹ بٹوٹ کرے کیا یار
ٹوٹ بٹوٹ کے چوہے چار

اِک چوہے کی گردن موٹی
اِک چوہے کی دُم ہے چھوٹی
اِک چوہے کی آنکھیں چار
ٹوٹ بٹوٹ کرے کیا یار
ٹوٹ بٹوٹ کے چوہے چار

اِک کھاتا ہے گوشت کی بوٹی
اِک کھاتا ہے سوکھی روٹی
اِک کھاتا ہے میٹھا چُورن
اِک کھاتا ہے پھیکا آچار
ٹوٹ بٹوٹ کرے کیا یار
ٹوٹ بٹوٹ کے چوہے چار

دو چوہے شیطان بہت ہیں
دو چوہے نادان بہت ہیں
دو ہنستے ہیں، دو روتے ہیں
دو تن درست ہیں، دو بیمار
ٹوٹ بٹوٹ کرے کیا یار
ٹوٹ بٹوٹ کے چوہے چار

جیتے ہیں نہ مرتے ہیں وہ
چُوں چُوں، چُوں چُوں کرتے ہیں وہ
کوئی بھی ان کو کام نہیں ہے
دن بھر پھرتے ہیں بے کار
ٹوٹ بٹوٹ کرے کیا یار
ٹوٹ بٹوٹ کے چوہے چار

یُوں تو ہر دم خوشی سے کھیلیں
اُچھلیں، کُودیں، کریں کُلیلیں
لیکن جب بھی مل کر بیٹھیں
کرتے ہیں سب چیخ پُکار
ٹوٹ بٹوٹ کرے کیا یار
ٹوٹ بٹوٹ کے چوہے چار


از صوفی غلام مصطفیٰ تبسّم​

 

[فاتح]

قبلہ آپ میں تو لگتا ہے ٹوٹ بٹوٹ کی روح حلول کرتی جا رہی ہے

 

[سیدہ شگفتہ]

اففف ۔ ۔ ۔ کتنے زیادہ مسائل ٹوٹ بٹوٹ کے

 

[ابن سعید]

خوب!‌

 

[فرخ منظور]

قبلہ آپ میں تو لگتا ہے ٹوٹ بٹوٹ کی روح حلول کرتی جا رہی ہے

حضور یہ موقعے کی مناسبت پر ہے۔ کبھی میر و غالب کی روح حلول کر جاتی ہے اور کبھی ٹوٹ بٹوٹ کی ۔ حالآنکہ ٹوٹ بٹوٹ نہ کبھی پیدا ہوا نہ کبھی مرا۔

 

[فرخ منظور]

اففف ۔ ۔ ۔ کتنے زیادہ مسائل ٹوٹ بٹوٹ کے

اگر مسائل زیادہ نہ ہوں تو پھر وہ ٹوٹ بٹوٹ ہی کیوں کہلائے۔

 

[فرخ منظور]

خوب!‌

بہت شکریہ!

 

[فاتح]

حضور یہ موقعے کی مناسبت پر ہے۔ کبھی میر و غالب کی روح حلول کر جاتی ہے اور کبھی ٹوٹ بٹوٹ کی ۔ حالآنکہ ٹوٹ بٹوٹ نہ کبھی پیدا ہوا نہ کبھی مرا۔

ہم تو سوچ رہے ہیں ٹوٹ بٹوٹ کو پوجنا شروع کر دیں

 

[فرحت کیانی]

فاتح نے صحیح کہا تھا۔ ٹوٹ بٹوٹ کے پاس تو پورا چڑیا گھر ہے۔

بہت شکریہ سخنور!

 

[محمد وارث]

ہم تو سوچ رہے ہیں ٹوٹ بٹوٹ کو پوجنا شروع کر دیں

لیکن میں سرگرداں ہوں کہ آپ "راکھ" سے "پتھّر" کیسے بنائیں گے

 

[فرخ منظور]

لیکن میں سرگرداں ہوں کہ آپ "راکھ" سے "پتھّر" کیسے بنائیں گے

کیا پتا بھبوت رما کر بیٹھ جائیں۔

 

[فاتح]

لیکن میں سرگرداں ہوں کہ آپ "راکھ" سے "پتھّر" کیسے بنائیں گے

قبلہ! آپ سے آزر کی سرگردانی بھی کسی کام نہ آئے گی کیا؟

 

[محمد وارث]

قبلہ! آپ سے آزر کی سرگردانی بھی کسی کام نہ آئے گی کیا؟

اجی کہاں کی آزری قبلہ، یہاں محفل پر ہی کئی 'ابراہیم' بننے کو تیار بیٹھے ہیں، اور ہر کسی کو منہ پر 'انکل آزر، انکل آزر' کہتے تھکتے نہیں اور دل میں کلہاڑے لیے تیار بیٹھے ہیں لیکن نہیں جانتے کہ بیٹا بھی قربان پڑتا ہے اس "کھیل" میں

 

[محمد وارث]

کیا پتا بھبوت رما کر بیٹھ جائیں۔

مگر یہ خاکسار تو آپ کے فراق کی آگ میں جل، اپنی راکھ کا بھبوت رما، کب سے بیٹھا ہوا ہے، اب انتظار کون کرے

 

[فرخ منظور]

مگر یہ خاکسار تو آپ کے فراق کی آگ میں جل، اپنی راکھ کا بھبوت رما، کب سے بیٹھا ہوا ہے، اب انتظار کون کرے

حضور وہ دن بھی آئے گا جب مل بیٹھیں گے دیوانے تین۔

 

[ابن سعید]

دھونی رمانا تو سنا تھا یہ بھبھوت کیسے رماتے ہیں؟

 

[فاتح]

دھونی رمانا تو سنا تھا یہ بھبھوت کیسے رماتے ہیں؟

بھبوت مل کر

یوں تو اپنی اپنی جگہ دونوں ہی درست محاورے ہیں لیکن یہاں پر چونکہ ذکر خاک کا چل نکلا تھا تو بھبوت (خاک) رمانے کا محاورہ استعمال کیا گیا۔
دھونی رمانا یعنی دھواں کر کے (آگ جلا کر یا الاؤ روشن کر کے) بیٹھنا۔
بھبھوت رمانا یعنی جسم پر خاک مل کر بیٹھ جانا یا محاورتاً دنیا تیاگ کر فقیر بن جانا۔

 

[ابن سعید]

بھبھوت راکھ کو کہتے ہیں۔