ساغر صدیقی وُسعتِ کیُسوئے جاناں سے اُلجھ بیٹھے ہیں - ساغر صدیقی

وُسعتِ کیُسوئے جاناں سے اُلجھ بیٹھے ہیں
صورتِ گردشِ دوراں سے اُلجھ بیٹھے ہیں

مدحتِ بادۃِ انگور کی خاطر ساقی
رِند اک صاحبِ ایماں سے اُلجھ بیٹھے ہیں

چند نغمے جو مرے سازِ جنوں نے چھیڑے
مستیِ چشمِ غزالاں سے اُلجھ بیٹھے ہیں

آج گمنامیِ احساس کا پرچم لے کر
آدمی شہرتِ یزداں سے اُلجھ بیٹھے ہیں

ایسے کچھ لوگ جنہیں صاحبِ اخلاص کہیں
پھر مرے حالِ پریشاں سے اُلجھ بیٹھے ہیں

نکہتیں صحنِ گلستاں سے خبر لائی ہیں
پھول آدابِ گلستاں سے اُلجھ بیٹھے ہیں

کچھ پتنگے کہ عطا ہے جنہیں شعلوں کا مزاج
رونقِ شامِ غریباں سے اُلجھ بیٹھے ہیں​
ساغر صدیقی
 
Top