بےباک

محفلین
ننھے کے ابّا سے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رونقِ دفتر کیا تو نے مرا خانہ خراب
چند گھنٹہ آتا ہے گھر میں مرے بن کر عذاب
اِس طرح آماجگاہِ شور و شر بن جائے گا
کیا خبر تھی تیرا دفتر میرا گھر بن جائے گا
ایک دو بچوں کی خواہش تھی مجھے بھی جانِ جاں
تو نے درجن بھر کی مجھ سے ٹیم بنوا دی یہاں
ساری تصویریں نہیں میری یہ کچھ تیری بھی ہیں
ساری تقصیریں نہیں میری کہ کچھ تیری بھی ہیں
پردۂ شب میں نہاں اعمال کی تفسیر ہیں
ظلمتوں کی اوٹ سے نکلی ہوئی تنویر ہیں
مجھ سے تنہا چل نہیں سکتا یہ کاروبار تھا
میں نہ تھی بالکل اکیلی تو شریک کار تھا
تو یہ کہتا تھا کہ تجھ کو چاہئے ہے اِک پسر
تیری خاطر طے کئے میں نے کئی لمبے سفر
کوششوں میں میری نیت گرچہ بالکل نیک تھی
ہر دفعہ لیکن تری قسمت میں دُختر ایک تھی
نو مہینے کا بھی وقفہ تھا تجھے بارِ گراں
رفتہ رفتہ بن گئی میں درجنوں بچوں کی ماں
شرحِ پیدائش تھی اتنی تیز کیا بتلاؤں میں
مجھ سے ممکن ہی نہ تھا گاڑی کو اب رکواؤں میں
کر رہا ہے اب مجھے آگاہ نقصانات سے
اور تب سوجھی نہیں بہبودِ آبادی تجھے
زر کی ہو افراط تو خطرہ نہیں اس میں مگر
کہہ رہا ہے تو کہ ہے خطرہ جو ہو افراطِ سر
یہ بتا مجھ کو کہ تو ہے کیوں پریشاں اس قدر
باعثِ شرمندگی کیوں بن گئے تیرے پسر
آگئی میں تیرے گھر میں تھا مرا بختِ سیاہ
شکل و صورت میری بگڑی ہوگئی حالت تباہ
تجھ کو اس سے کیا غرض کوئی جیئے کوئی مرے
مجھ کو بد ہیبت کیا ، تجھ کو خدا غارت کرے
اتنے بچے کردیئے پیدا مجھے تو داد دے
لگ پتہ جائے تجھے گر ایک تو پیدا کرے،
--------== ختم شد ------------
بشکریہ شاعر : سید مظہر عباس رضوی
 
Top