ساحر نذرِ کالج (لدھیانہ گورنمنٹ کالج 1943ء)

[سید زبیر]

​

نذرِ کالج (لدھیانہ گورنمنٹ کالج 1943ء)​

​

اے سرزمینِ پاک کے یارانِ نیک نام​

باصد خلوص شاعرِ آوارہ کا سلام​

اے وادئ جمیل میرے دل کی دھڑکنیں​

آداب کہہ رہی ہیں تری بارگاہ میں!​

تو آج بھی ہے میرے لیے جنتِ خیال​

ہیں تجھ میں دفن میری جوانی کے چار سال​

کمھلائے ہیں یہاں پہ مری زندگی کے پھول​

ان راستوں میں دفن ہیں میری خوشی کے پھول​

تیری نوازشوں کو بھلایا نہ جائے گا​

ماضی کا نقش دل سے مٹایا نہ جائے گا​

تیری نشاط خیز فضائے جواں کی خیر​

گلہائے رنگ و بو کے حسیں کارواں کی خیر​

دورِ خزاں میں بھی تری کلیاں کھلی رہیں​

تا حشر یہ حسین فضائیں بسی رہیں!​

ہم ایک خار تھے جو چمن سے نکل گئے​

ننگِ وطن تھےحدِ وطن سے نکل گئے​

گائے ہیں اس فضا میں وفاؤں کے راگ بھی​

نغماتِ آتشیں سے بکھیری ہے آگ بھی!​

​

سرکش بنے ہیں گیت بغاوت کے گائے ہیں​

برسوں نئے نظام کے نقشے بنائے ہیں​

نغمہ نشاطِ روح کا گایا ہے بارہا​

گیتوں میں آنسوؤں کو چھپایا ہے بارہا​

معصومیوں کے جرم میں بدنام ہم ہوئے​

تیرے طفیل موردِ الزام بھی ہوئے​

اس سرزمیں پہ آج ہم اک بار ہی سہی​

دنیا ہمارے نام سے بیزار ہی سہی​

لیکن ہم ان فضاؤں کے پالے ہوئے تو ہیں​

گریاں نہیں تو یاں سے نکالے ہوئے تو ہیں​

ساحر لدھیانوی ​

۔۔۔۔۔۔۔۔۔۔۔۔۔۔۔​

​

​

 

[تلمیذ]

کالج یونیورسٹی کی یادیں بھی زندگی کا کیا حسین سرمایہ ہوتی ہیں۔
بہت شکریہ، جناب۔