مانگے برائے اصلاح

احمد فراز صاحب کی زمین کا قافیہ بدل کے ایک غزل۔ برائے اصلاح

ایک جگنو کہ مقدر ہے بھٹکنا جس کا​

ایک تتلی کہ جو جگنو سے اجالے مانگے​

​

ایک ساحل کہ تڑپتا رہے موجوں کے لئے​

اور اک دل ہے، زباں پر بھی جو تالے مانگے​

​

کون جانے بھلا معیار کیا ہے اس کا​

وہ مسافر جو اندھیروں سے اجالے مانگے​

​

جانے کس دور میں زمیں پر اترا ہوں میں کہ آج​

زندہ رہنے کے بھی انسان حوالے مانگے​

​

میری تصویر میں ٹوٹے ہوئے کردار ہیں سب​

اور مرا یار تو شہکار نرالے مانگے​

 

استادِ محترم الف عین صاحب
مزمل شیخ بسمل بھائی
اسد قریشی صاحب
محمد اظہر نذیر صاحب
شاہد شاہنواز صاحب

 

ایک جگنو ہے کہ منزل کے حوالے مانگے​

ایک تتلی ہے کہ جگنو سے اُجالے مانگے ​

مقدر بھٹکتا ہے یا جگنو خود مقدر، منزل کی تلاش میں ہے، مفہوم قریب ہی ہے، اس لیے ذرا سی تبدیلی کے ساتھ مطلع ہو سکتا ہے۔

ایک محشر ہے کہ دل میں بپا رہتا ہے​

اور دل ہے کہ زباں پر بھی یہ تالے مانگے​

ساحل اگر موجوں کے لیے تڑپتا ہے تو اس کا دل اور پھر زباں پر تالے لاگانے سے کیا تعلق ؟ ایک تجویز ہے جو کہ شعر کا مفہوم واضح کر سکتی ہے۔

کیسے پائے گا وہ منزل کا پتا سوچو تو!​

وہ مسافر جو اندھیروں سے اُجالے مانگے​

معیار کا تعلق مصرعہِ ثانی سے کچھ واضح نہیں ہے، اگر یوں کر لیں تو؟

جانے کس دور میں پہنچے ہیں یہ انساں کہ جہاں​

زندہ رہنے کے بھی انسان حوالے مانگے​

ہم اکیلے ہی اس دور میں نہیں اُتارے گئے ہیں ہمارے ساتھ اور بھی بہت سے لوگ ہیں، ہاں اگر آپ "مس فٹ" ثابت کرنا چاہتے ہیں تو بات اور ہے۔

میری تصویر کے سب رنگ شکستہ ہوئے​

اور مرا یار کہ شہکار نرالے مانگے​

شاہد شاہنواز بھائی نے درست فرمایا، شاہکار کا تعلق تخلیق سے ہی ہوتا ہے اس لیے ایک تجویز حاضر ہے۔

پیرِ سُخنفراز صاحب کی زمین ہو اور اسد قریشی خاموش رہ جائیں ایسا ممکن نہیں ۔لیکن یہ ضرور ممکن ہے کہ جوشِ جذبات میں کچھ زیادہ بول گئے ہوں جس کے لیے معاف چاہتے ہیں۔

 

شاہد شاہنواز صاحب اور اسد قریشی صاحب​

​

بہت بہت شکریہ آپ کا۔​

​

باقی اشعار کو بھی دیکھتا ہوں۔ فی الوقت تو بس ایک مشورہ​

اگر اس شعر کو ایسے کر دیا جائے​

جانے کس دور میں زمیں پر اترا ہوں میں بلال​

زندہ رہنے کے بھی انسان حوالے مانگے​

​

ویسے "مس فٹ" کیا چیز ہوتی ہے؟​

اس کی کوئی تفصیل بتائیں۔​

​

 

اسد قریشی صاحب نے تو جو کچھ لکھا ہے، اس پر کچھ نہیں کہہ سکتا، لیکن آپ کا یہ خیال:

پہلا مصرع پھر مس فٹ ہے۔ یہاں مس فٹ سے مراد بے وزن ہونا ہے کیونکہ میں اس کو تحت اللفظ نہیں پڑھ سکتا۔ تقطیع اچھی طرح کرلیجئے گا۔

 

​

واہ واہ​

بہت خوشی ہوئی آپ کی فراز صاحب سے اتنی عقیدت دیکھ کر۔​

​

 

پہلے شعر کی اصلاح اسد کی بہت عمدہ ہے، قبول کر لو۔
دوسرے شعر کی صورت میرے نزدیک یوں بہتر ہے؛

ایک وہ حشر ہے جو دل میں بپا رہتا ہے​

اور اک دل ہے، زباں پر بھی جو تالے مانگے​

تیسرا شعر سمجھ میں نہیں آیا کہ کیا کہنا چاہتے ہو، اسد کی اصلاح میں تو مفہوم ہی بدل جاتا ہے۔​

اس شعر کو ذرا سی تبدیلی سے یوں کر دیں تو وزن میں درست آ جائے:​

جانے کس دور میں دھرتی پہ میں اترا ہوں بلال
زندہ رہنے کے بھی انسان حوالے مانگے
آخری شعر کی اصلاح اسد کی درست تو ہے لیکن بے وزن۔ اس کو یوں کر دو:
میری تصویر کے سب رنگ زوال آمادہ
اور مرا یار کہ شہکار نرالے مانگے
​

 

فی الحال تو غزل اس طرح بنی ہے (جن میں سے آدھے مصرع آپ کے ہیں اور باقی آدھے بھی آپ کے ہی ہیں)

ایک جگنو ہے کہ منزل کے حوالے مانگے​

ایک تتلی ہے کہ جگنو سے اُجالے مانگے​

​

ایک وہ حشر ہے جو دل میں بپا رہتا ہے​

اور اک دل ہے، زباں پر بھی جو تالے مانگے​

​

میری تصویر کے سب رنگ زوال آمادہ​

اور مرا یار کہ شہکار نرالے مانگے​

​

جانے کس دور میں دھرتی پہ میں اترا ہوں بلال​

زندہ رہنے کے بھی انسان حوالے مانگے​

​

اب ایک دو اشعار اور ہو جائیں تو غزل کی کوئی صورت نکل ہے۔​

​

 

دو شعر

وہ حسیں شکل بھی تھی، وصل کی رُت بھی تھی، مگر
دل نے مانگے بھی تو بس خوں کے پیالے مانگے

اوپر والے کا مجھے پتہ نہیں لیکن یہ شعر مجھے تو بالکل بھی رواںمحسوس نہیں ہوا
قسمتِ قیس کی اب دربدری ختم ہوئی
آج تو لیلیٰ نے بھی دیس نکالے مانگے

 

پہلا شعر دو لخت ہے، دوبوں مصرعوں میں بطاہر ربط نہیں۔

قسمتِ قیس کی اب دربدری ختم ہوئی​

آج تو لیلیٰ نے بھی دیس نکالے مانگے​

قسمتِ قیس؟​

صرف یوں بہتر ہوگا​

قیس کی آخرش اب دربدری ختم ہوئی​

آج تو لیلیٰ نے بھی دیس نکالے مانگے​

 

اب شعر زبردست ہو گیا ہے۔

دل نے مانگے بھی تو بس خوں کے پیالے مانگے​

یہ مصرع ذاتی طور پہ اچھا لگا ہے، اس لئے کوشش کرتا ہوں شاید اس کی کوئی صورت نکل آئے۔

 

استادِ محترم اگر شعر ایسے کر لیا جائے:

رسم ہی اب کے کچھ ایسی چلی جاناں کہ مرے،
دل نے مانگے بھی تو بس خوں کے پیالے مانگے

 

کون سی رسم ؟؟

 

رسم تو یہی کہ دل خون پینا چاہ رہا ہے!!
لیکن شعر میں ’جاناں‘ جیسے بھرتی کے الفاظ مجھے پسند نہیں۔

 

استادِ محترم الف عین صاحب اب دیکھیں

رسم کچھ ایسی چلی موسمِ گُل میں بھی کہ، اِس
دل نے مانگے بھی تو بس خوں کے پیالے مانگے

 

اس اور دل نے کو جدا کرنا آپ کا ہمیں تو اچھا نہیں لگ رہا۔۔۔

 

اس طرح کی ایک مثال میں نے احمد فراز کی ایک نظم "اب کس کا جشن مناتے ہو!" میں دیکھی تھی:

اُن معصوموں کا جن کے لہو
سے تم نے فروزاں راتیں کی
یا ان مظلوموں کا جن سے
خنجر کی زباں میں باتیں کی

ویسے اچھا تو مجھے بھی نہیں لگا لیکن میں نے سوچا کہ باقی محفل پہ پتہ چل جائے گا۔

 

فراز کی نظم کا معاملہ دوسرا ہے، وہاں ممکن ہے کہ دو ٹکڑوں کو ملا کر ایک طویل مصرع کیا گیا ہو۔
یہ مصرع بہتر ہے مفہوم کے لحاظ سے، لیکن ’دل نے مانگے بھی تو‘ سے بات بگڑ جاتی ہے۔
رسم کچھ ایسی چلی موسم گل میں کہ یہاں
سب نے مانگے بھی تو بس خون کے پیالے÷ خوں کے پیالے مانگے