عدم لیا کیا تخیّل نے مفہوم ہو کر - عبدالحمید عدم

[معاویہ وقاص]

لیا کیا تخیّل نے مفہوم ہو کر
فنا ہوگئے لفظ مرقوم ہو کر

تری آنکھ کی نیتوں نے اچانک
بڑا کیف بخشا ہے معلوم ہو کر

جِیئے تو محبّت کی توہین ہوگی
جئیں گے نہ ہم تجھ سے محروم ہو کر

ہمیں حلقہء زلف میں قید کرلے
ہم آزاد ہوتے ہیں محکوم ہو کر

نہ معلوم کس سمت جاتے ہیں انساں
تلاشِ مسرّت میں معدوم ہو کر

عدم خدمتِ خلق حُبِّ خدا ہے
سکوں کس کو ملتا ہے مخدُوم ہو کر

عبدالحمید عدم

 

[عاطف بٹ]

جِیئے تو محبّت کی توہین ہوگی
جئیں گے نہ ہم تجھ سے محروم ہو کر

عدم خدمتِ خلق حُبِّ خدا ہے
سکوں کس کو ملتا ہے مخدُوم ہو کر

واہ، بہت ہی عمدہ۔

 

[طارق شاہ]

عمدہ جناب !

لیا کیا تخیّل نے مفہوم ہو کر
فنا ہوگئے لفظ مرقوم ہو کر

عدم صاحب کو لکھنا یوں چاہئے تھا کہ :

کِیا وہ تخیّل نے مفہوم ہو کر
اَمر ہوگئے لفظ، مرقوم ہو کر

بہت شکریہ شیئر کرنے کا، خوش رہیں

 

[سید زبیر]

بہت خوب

عدم خدمتِ خلق حُبِّ خدا ہے​

سکوں کس کو ملتا ہے مخدُوم ہو کر​

واہ ۔۔۔خوبصورت انتخاب​