فراق فِراق گورکھپُوری ::::: یہ شوخئ نِگاہ کسی پر عیاں نہیں ! ::::: Firaq Gorakhpuri

[طارق شاہ]

غزلِ

فِراق گورکھپُوری

یہ شوخئ نِگاہ کسی پر عیاں نہیں !
تاثیرِ دردِ عِشق، کہاں ہے کہاں نہیں

عِشق اِس طرح مِٹا کہ عَدم تک نِشاں نہیں
آ سامنے، کہ میں بھی تو اب درمیاں نہیں

مُجھ کو بھی اپنے حال کا وہْم و گُماں نہیں
تم راز داں نہیں تو کوئی راز داں نہیں

صیّاد اِس طرح تو فریبِ سُکوں نہ دے
اِس درجہ تو مجھے بھی غمِ آشیاں نہیں

اِس درگُزر سے، اور کھُلا عِشق کا بَھرَم
یہ کیا ہُوا، کہ مُجھ سے وہ اب سرگراں نہیں

پس ماندگان اب اور ہی ڈھونڈیں دلِیلِ راہ
اِتنی بُلند، گردِ رہِ کارواں نہیں

محْوِ سُکوتِ ناز ازل سے ہے بزمِ عِشق
قِصّہ نہیں، فسانہ نہیں، داستاں نہیں

ہیں پُرسِشِ نہاں کے بھی عُنوان سینکڑوں
اِتنا تِرا سُکوتِ نظر بے زباں نہیں

اے دوست! اہلِ درد کے رازِ سُکوں نہ پُوچھ
مُدّت ہُوئی نِگاہ تِری درمیاں نہیں

کیا حشْر دیکھیے ہو اب اِس اعتدال کا
سُنتے ہیں عِشق درپئے آزارِ جاں نہیں

کیا حشْرِ وعدہ، کیا رگِ جاں، کیا حَرِیمِ راز
یہ جانتا ہُوں! توُ ہے جہاں، میں وہاں نہیں

ہمدم! دیارِ دِل کی جنوُں خیزِیاں ہیں اور
زِنداں نہیں ہے، دشت نہیں، گُلسِتاں نہیں

تھا حاصلِ حیات بس اِک عشوۂ نہاں
اب یہ نہ پُوچھ عِشق کہاں ہے، کہاں نہیں

کیا واقعی فریب ہے اے دل! حیاتِ عِشق
یُوں مژدۂ وِصال سے میں شادماں نہیں

ہستی کے اِنقلاب کو کیا کیجیے، فِراق !
مانا کہ ہجرِ یار، غمِ جاوِداں نہیں

فِراق گورکھپُوری
(رگھوپتی سہائے )​