جمال احسانی غزل ۔ تنہا بھی منہ اُٹھا کے نکلنا محال ہے ۔ جمال احسانی

غزل ​

​

تنہا بھی منہ اُٹھا کے نکلنا محال ہے​

ہمراہ بھی ہجوم کے چلنا محال ہے​

​

حرفِ دعا کا صفحہ ء دستِ بلند پر​

وہ بوجھ ہے کہ ہاتھ بدلنا محال ہے​

​

دل نے جلائی ہیں جو سرِ طاقِ انتظار​

اُن موم بتیوں کا پگھلنا محال ہے​

​

گم کیا ہوا ہے کاسہ ء درویش شہر میں​

نظریں اُٹھا کے شہر کا چلنا محال ہے​

​

میرے بھی دستخط ہیں سرِ محضرِ شکست​

میرے لئے بھی بچ کے نکلنا محال ہے​

​

جمالؔ احسانی​

 

میرے لئے بھی بچ کے نکلنا محال ہے
شاعر یقیناََ پاکستانی نہیں۔۔

 

شاعر ہیں تو پاکستانی ہی ۔ لیکن شاعرانہ مزاج رکھتے ہیں سو خود بچ بھی نکلے تو ضمیر بھیا نہیں چھوڑیں گے۔

 

گم کیا ہوا ہے کاسہ ء درویش شہر میں
نظریں اُٹھا کے شہر کا چلنا محال ہے
واہ

 

انتخاب کی پسندیدگی کا شکریہ۔۔۔۔۔!

 

اُن موم بتیوں کا پگھلنا محال ہے ۔۔۔۔ کیا اچھا کہا ہے۔۔ بھئی بہت خوب