خالد احمد غزل ۔۔ اک اجاڑ بستی کا اک اداس جادہ تھا ۔۔خالد احمد

[نوید صادق]

خالد احمد

غزل

اک اجاڑ بستی کا اک اداس جادہ تھا
اور بادیہ پیما ایک مستِ بادہ تھا

حسنِ کم نگاہی پر عمر بھر نہ کھل پایا
دل کی بند مٹھی میں ایک حرف سادہ تھا

عمر بھر کے غم لے کے چشم نم اُمڈ آئے
وجہ ِ گرم بازاری اک غلام زادہ تھا

ہرمحل پہ سایہ تھا کچھ دراز پلکوں کا
خواب خواب آنکھوں میں ایک شاہ زادہ تھا

بادشاہ کے گھر تک آنچ کس طرح آتی
اس بساط پر باقی اب تک اک پیادہ تھا

صبر کا علم اب تک سربلند تھا لیکن
شہرِ گنگ میں چرچا جبر کا زیادہ تھا

قافلے ہواﺅں کے دل بہ کف گداﺅں کے
دشت میں نکل آئے، شہر کا ارادہ تھا

شاخ شاخ تھی جس کی، کل بہار پیرایہ
وہ ہزار پیراہن آج بے لبادہ تھا

ایک دن تو دھلنا تھے داغ نارسائی کے
ہم بھی جانتے تھے یہ قتل بے ارادہ تھا

شکوہ کج ادائی کا، رنج نا رسائی کا
اور پارسائی کا، ہر سخن اعادہ تھا

شہر ِ ہجر میں خالد دوست دو ہمارے تھے
اک چراغِ جادہ تھا، اک رُخِ کشادہ تھا

رات کی سیاہی بھی پڑ رہی تھی کم خالد
اک چراغ زادہ تھا، اک چراغِ جادہ تھا​

​

(خالد احمد)​

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

[فاتح]

شہر ِ ہجر میں خالد دوست دو ہمارے تھے
اک چراغِ جادہ تھا، اک رُخِ کشادہ تھا
​

واہ کیا خوبورت انداز میں تمام قافیے برتے ہیں۔ نوید صاحب! ارسال کرنے کا شکریہ!

 

[فرخ منظور]

بہت خوبصورت غزل ہے۔ بہت شکریہ نوید بھائی۔ ایک شعر تو رات کے پچھلے پہر ہی پڑھ لیا تھا۔

 

[مغزل]

کمال غزل ہے ، سبحان اللہ سبحان اللہ ، بہت خوب، نوید بھائی رات کے پچھلے پہر غزل کا مقطع تو پڑھنے کو میسر ہو ہی گیا تھا۔ تمام غزل دیکھ کر کیفیت بن گئی ، سبحان اللہ ، بہت عمدہ انتخاب اور کیا خوب کلام ہے۔ مطلع پڑھ کر تو ادبِ عالیہ کی یاد آگئی ۔ سبحان اللہ