غزل ۔۔۔ حلقہء دل سے نکل‘ وقت کی فرہنگ میں کھل ۔۔۔ خالد علیم

[نوید صادق]

خالد علیم​

غزل

حلقہء دل سے نکل‘ وقت کی فرہنگ میں کھل
اے مرے خواب! کسی عکسِ صدا رنگ میں کھل

اے مرے رہروِ جاں! کس نے کہا تھا تجھ کو
آنکھ سے دل میں اُتر‘ درد کے آہنگ میں کھل

اے مری خامشیِ کرب نما خود سے نکل
تجھ کو کھلنا ہے تو دشمن کے دلِ تنگ میں کھل

اے لہو ہوتی ہوئی موجِ غمِ ہجر ذرا
خیمہء خاک سے چل اور رگِ سنگ میں کھل

ایک لمحے کی پس و پیش بھی ہوتی ہے بہت
اب تو اے جذبہء صد رنگ ! کسی رنگ میں کھل
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خالد علیم
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مطبوعہ ماہنامہ بیاض​

 

[فرخ منظور]

بہت خوب غزل ہے۔ شکریہ نوید صاحب!

 

[فاتح]

واہ واہ واہ انتہائی خوبصورت تراکیب کا بر محل استعمال کیا ہے۔ بہت شکریہ جناب

 

[الف عین]

خلد علیم کی تراکیب واقعی کمال کی ہیں۔

 

[مغزل]

سبحان اللہ ، واہ ، جواب نہیں خالد صاحب کا،

 

[عمران شناور]

بہت اچھی شیئرنگ ہے۔ نوید صاحب! شکریہ