نظر لکھنوی غزل: سلسلہ ہائے رنج و غم ہیں طویل٭ نظرؔ لکھنوی

[محمد تابش صدیقی]

دادا مرحوم کی ایک غزل، احبابِ محفل کی نذر :

سلسلہ ہائے رنج و غم ہیں طویل
مدتِ زندگی خوشا ہے قلیل

اس کے جلووں کی بارشِ پیہم
ہائے محرومئ نگاہِ علیل

اصل بس لا الٰہ الّا اللہ
اور سب قیل و قالِ مردِ عقیل

یاد آئی ہے کس نگاریں کی
دل مجسم بنا ہے نقشِ جمیل

کھینچتی ہے جو اپنی سمت حیات
موت دیتی ہمیں ہے بانگِ رحیل

داستانِ غمِ حیات نہ پوچھ
مختصر یہ کہ ہے طویل و ثقیل

نار نمرود تاب لا نہ سکی
جل بجھی آخرش زنورِ خلیل

جس کا عاشق ہے صانعِ عالم
میرا محبوب وہ حسین و جمیل

روشنی پھر کہاں مقدر میں
بجھ گئی دل کی گر نظرؔ قندیل

محمد عبد الحمید صدیقی نظر لکھنوی​

 

[نیرنگ خیال]

واہ۔۔۔ کیا ہی خوبصورت غزل ہے۔۔۔ یعنی آپ ادبی کیاری کے سینچے ہوئے پودے ہیں۔۔۔۔ کیا کہنے۔۔۔۔ سلامت رہیے۔

 

[محمد تابش صدیقی]

واہ۔۔۔ کیا ہی خوبصورت غزل ہے۔۔۔ یعنی آپ ادبی کیاری کے سینچے ہوئے پودے ہیں۔۔۔۔ کیا کہنے۔۔۔۔ سلامت رہیے۔

بہت شکریہ جناب محبتوں کا