شفیق خلش شفیق خلش ::::: مِرے دُکھوں کا خلِش اب یہی ازالہ ہے ::::: Shafiq Khalish

طارق شاہ

محفلین
غزلِ
شفیق خلش

مِرے دُکھوں کا خلِش اب یہی ازالہ ہے
اُمیدِ وصل ہے جس نے مجھے سنبھالا ہے

جو تم نہیں ہو، تو ہے زندگی اندھیروں میں
مِرے نصیب میں باقی کہاں اُجالا ہے

سکوت مرگ سا طاری تھا اک زمانے سے
یہ کِس کی یاد نے پھر دِل مِرا اُچھالا ہے

رہا نہ کوئی گلہ اب وطن کے لوگوں سے
یہاں بھی خُوں مِرا، کِس نے نہیں اُبالا ہے

خود اپنے ذات کی پہچان اب نہیں باقی
شناختیں ہیں تجھی سے، تِرا حوالہ ہے

نہاں ہیں حِرص کی کیا کیا نہ خواہشیں اِس میں
یہ میرا دل ہے نہ مسجد ہے، نہ شوالہ ہے

رہی نہ کوئی خلش بات جب ہُوئی واضح
بَلائے غم کو مِری ذات اِک نوالہ ہے

شفیق خلش
 
آخری تدوین:
Top