شفیق خلش شفیق خلش ::::: رہے پیش سب ہی وعدے مجھے زندگی میں کل کے ::::: Shafiq Khalish

[طارق شاہ]

غزلِ
شفیق خلش

رہے پیش سب ہی وعدے مجھے زندگی میں کل کے
بُجھی زیست میری جن میں بڑی بے کلی سے جل کے

یوں گنوادی عُمر ساری کیے وعدوں پر بہل کے
نہیں خواب تک سلامت وہ خوشی سے پُر محل کے

رہے رنج مجھ کو یُوں بھی، کہ نہ ہمسفر تھے پل کے
وہ جُدا ہوئے ہیں مجھ سے، بڑی دُور ساتھ چل کے

گِریں فُرقِ ہمقدم میں، سبھی جا ہی ضُعفِ دِل سے
کب اُٹھیں قدم خلِش اب کسی راہ بھی سنبھل کے

مجھے کچھ سمجھ نہ آئے کہ اچانک ایسے کیونکر
اب بدل دِیں تم نے راہیں مِری زندگی بدل کے

ہُوا نقش میرے دل پر، تِرا حُسن، تیرا چلنا
وہ طِلِسمِ جاں کے جس سے رہا دِل مِرا مچل کے

پسِ مرگ تِیرَگی کا مجھے روز سامنا ہے
کہاں دِن چڑھا دوبارہ تِرے بعد میرا ڈھل کے

کب اب اِن میں زندگی کی رہی کچھ رَمَق بھی باقی
تِرے مُنتظر ایّام اب، ہُوئے مُنتظر اجَل کے

تِری طرح بے مروّت کبھی لوٹ کر نہ آئی
تِرے آنے پر قضا جو، گئی ایک بار ٹل کے

ہے عجیب شہرِدِل بھی، کہ نہیں ہے اِس میں اِمروز
نہ ہی دن چڑھے نیا کچھ ، وہی سانحے ہیں کل کے

ہُوئے دفن ذات میں ہی خلِش اِس نگر میں آ کر
بَھلا اور کیا وہ کرتے، تِرے شہر سے نِکل کے

شفیق خلش
********​