سیدعابدعلی عابد ::::: بہار آئی ہے زخمِ جگر کا نام تو لو ::::: Syed Abid Ali Abid

[طارق شاہ]

غزلِ
سیدعابدعلی عابد

بہار آئی ہے زخمِ جگر کا نام تو لو
کوئی بہانہ ہو، اہلِ ہُنر کا نام تو لو

ڈرا چُکے ہو، نصِیحت گرو بہت مُجھ کو
چَلو اب اُس بُتِ بیداد گر کا نام تو لو

دُرست، اُس کے یہاں نارَسا ہے عرضِ وَفا
فُغاں کی بات تو چھیڑو ، اثر کا نام تو لو

فسانۂ شبِ فُرقت میں، برسبیلِ کلام
فریب دے کے نِگارِ سَحر کا نام تو لو

حواس اُڑ گئے اے ساتھیو، کہاں پُہنچے
نشانِ راہ کا، گردِ سفر کا نام تو لو

تبسّمِ لبِ لعلِیں کی دیکھنا ہو بہار
تو بزمِ یارمیں تم چشمِ ترکا نام تو لو

جہاں چمن میں غزل خواں ہیں بُلبُلانِ اسِیر
وہاں مِرے نفسِ شُعلہ گر کا نام تو لو

خفا ہے مُجھ سے، جو وہ پَردہ دارِ حُجرۂ ناز
مجھے خبر بھی نہیں، پردہ در کا نام تو لو

بغیر بحث بھی، کٹتی ہے آج کل تو زباں
اگر کا ذکر تو چھیڑو، مگر کا نام تو لو

سید عابد علی عابد​