سِیماب اکبرآبادی ::::: چمک جُگنو کی برقِ بے اماں معلوم ہوتی ہے ::::: Seemab Akbarabadi

[طارق شاہ]

غزلِ
سیماب اکبرآبادی

چمک جُگنو کی برقِ بے اماں معلوم ہوتی ہے
قفس میں رہ کے قدرِ آشیاں معلوم ہوتی ہے

کہانی میری رُودادِ جہاں معلوم ہوتی ہے
جو سُنتا ہے اُسی کی داستاں معلوم ہوتی ہے

ہَوائے شوق کی قوّت وہاں لے آئی ہے مجھ کو
جہاں منزِل بھی گردِ کارواں معلوم ہوتی ہے

قفس کی پتلیوں میں جانے کیا ترکیب رکھّی ہے
کہ ہر بجلی قریبِ آشیاں معلوم ہوتی ہے

ترقّی پر ہے روز افزوں خلِش دردِ محبّت کی
جہاں محسُوس ہوتی تھی، وہاں معلوم ہوتی ہے

نہ کیوں سِیماب مجھ کو قدر ہو ویرانیِ دِل کی
یہ بُنیادِ نشاطِ دوجہاں معلوم ہوتی ہے

سیماب اکبرآبادی​

 

[محمد تابش صدیقی]

خوبصورت انتخاب

ہَوائے شوق کی قوّت وہاں لے آئی ہے مجھ کو
جہاں منزِل بھی گردِ کارواں معلوم ہوتی ہے

 

[سارہ خان]

بہت خوب ۔۔۔۔ شیئر کرنے کا شکریہ ۔۔

 

[نیرنگ خیال]

قفس کی پتلیوں میں جانے کیا ترکیب رکھّی ہے
کہ ہر بجلی قریبِ آشیاں معلوم ہوتی ہے

ترقّی پر ہے روز افزوں خلِش دردِ محبّت کی
جہاں محسُوس ہوتی تھی، وہاں معلوم ہوتی ہے

یوں تو مکمل غزل ہی کمال ہے۔۔۔ لیکن یہ دو اشعار شاہ صاحب۔۔۔ کیا کہنے۔۔۔۔ اور خاص کر دوسرے والا۔۔۔ مزا آگیا۔۔۔۔