بشیر بدر :::::سُورج مکھی کے گالوں پہ تازہ گُلاب ہے:::::: Dr. Bashir Badr

طارق شاہ

محفلین



غزل
سُورج مکھی کے گالوں پہ تازہ گُلاب ہے
یہ میرا آفتاب، مِرا ماہتاب ہے

ہر تارہ، کپکپاتے ہُوئے ہونٹوں کی دُعا
یہ آسمان، حمد و ثنا کی کِتاب ہے

بادل ہَوا کی زد پہ بَرَس کے بِکھر گئے
اپنی جگہ چمکتا ہُوا آفتاب ہے

چَونکے تو، یہ طلِسمِ جہاں ٹُوٹ جائے گا !
عالَم تمام حلقۂ زنجیرِ خواب ہے

ناحق خیال کرتے ہو دُنیا کی بات کا !
تم کو خراب جو کہے، وہ خود خراب ہے

سب رِشتے ٹُوٹ جاتے ہیں برگ و بہار کے
اُڑنا ہَوا کے دَوش پہ کیسا عذاب ہے

ڈاکٹر بشیر بدؔر
 
Top