سرور سروراں فخر کون و مکاں ، تجھ سا کوئی کہاں تجھ سا کوئی کہاں

الف نظامی

لائبریرین
سرورِ سروراں فخرِ کون و مکاں ، تجھ سا کوئی کہاں تجھ سا کوئی کہاں
تیری چوکھٹ ہے بوسہ گہِ قدسیاں ، تجھ سا کوئی کہاں تجھ سا کوئی کہاں
جو زمانے میں پامال و بدحال تھے ، ان کو بخشے ہیں تو نے نئے ولولے
تجھ سے روشن ہوا بختِ تیرہ شباں ، تجھ سا کوئی کہاں تجھ سا کوئی کہاں
حدِ روح الامینی سے بھی ماوراء ، تیری محشر خرامی ہے معجز نما
اے گلستانِ وحدت کے سروِ رواں ، تجھ سا کوئی کہاں تجھ سا کوئی کہاں
تیرا طرزِ تکلم ہے موجِ صبا ، تیرے الفاظ پر نورو نکہت فدا
نطق سے تیرے ناطق ہے ربِ جہاں ، تجھ سا کوئی کہاں تجھ سا کوئی کہاں
زینت افزائے برجِ ”دنیٰ“ہے توئی ، مسند آرائے عرشِ علیٰ ہے توئی
ہے توئی بزمِ قوسین کا رازدا ں ، تجھ سا کوئی کہاں تجھ سا کوئی کہاں
تیری رحمت عداوت فراموش ہے ، تو عطا پاش ہے تو خطا پوش ہے
دشمنِ جاں کو بھی تو نے بخشی اماں ، تجھ سا کوئی کہاں تجھ سا کوئی کہاں
وہ جسے تیرا آئین مرغوب ہے ، کب وہ تہذیبِ حاضر سے مرعوب ہے
تیری سیرت تمدن کی روحِ رواں ، تجھ سا کوئی کہاں تجھ سا کوئی کہاں
قائدِ انس و جاں ، خسروِ خشک و تر ، رہبرانِ امم تیرے دریوزہ گر
تیرا ہر نقشِ پا نورِدیدہ وراں ، تجھ سا کوئی کہاں تجھ سا کوئی کہاں
میرے الفاظ درماندہ و بے نوا ، میرا سرمایہِ ِ فکرو فن نارسا
مجھ ساعاجز کہاں تیری مدحت کہاں ، تجھ سا کوئی کہاں تجھ سا کوئی کہاں
( سید شاکر القادری چشتی نظامی )​
 

محمد وارث

لائبریرین
کیا خوبصورت نعت ہے، سبحان اللہ۔

جزاک اللہ شاکر القادری صاحب۔

نوازش ارسال فرمانے کیلیے الف نظامی صاحب۔
 

عاطف بٹ

محفلین
وہ جسے تیرا آئین مرغوب ہے ، کب وہ تہذیب حاضر سے مرعوب ہے
تیری سیرت تمدن کی روح رواں ، تجھ سا کوئی کہاں تجھ سا کوئی کہاں
سبحان اللہ۔ بہت ہی عمدہ ہدیہء عقیدت ہے۔
جزاک اللہ خیرا
 

شاکرالقادری

لائبریرین
بہت شکریہ محمد خلیل الرحمٰن بھائی ۔۔۔۔۔ بس ایک دو مقامات رہ گئے ہیں
نقشِ پا ۔۔۔۔۔ سرمایۂ فکر و فن
اور ۔۔۔۔ برجِ دنیٰ (کھڑی زبر) عرشِ علیٰ (کھڑی زبر)
پسندیدگی اور داد کے لیے بھی شکر گزار ہوں
=======================
مزمل شیخ بسمل ۔۔۔! بہت شکریہ، اور یہ ہم پر استادی کی تہمت ناحق ہے ۔۔۔ہم تو آپ سے اور فاتح سے کچھ نقد و نظر کی توقع کر رہے تھے آپ لوگوں نے تو صرف داد پر ہی ٹرخا دیا :)
=======================
فاتح ۔۔۔! پذیریائی کے لیے بہت شکریہ
 

فاتح

لائبریرین
ہم تو آپ سے اور فاتح سے کچھ نقد و نظر کی توقع کر رہے تھے آپ لوگوں نے تو صرف داد پر ہی ٹرخا دیا :)
فاتح ۔۔۔ ! پذیریائی کے لیے بہت شکریہ
شاکر بھائی! کم از کم ہم میں اتنی ہمت نہیں کہ نعت پر نقد و نظر کی آڑ لے کر نکتہ چینی کر سکیں۔ :)
 

شاکرالقادری

لائبریرین
میرے نزدیک تو نعت کے معاملہ میں زیادہ نقد و نظر کی ضرورت ہے تاکہ بارگاہ رسالت میں جو بھی ہدیہ پیش کیا جائے وہ کسی بھی دوسری صنف سخن کے معیار سے کمتر نہ ہو ۔۔ اور عقیدت کی چھوٹ دے کر ۔۔۔ ہر غیر معیاری کلام کو نعت کے نام پر پیش کر دینے کی حوصلہ افزائی نہ ہو سکے
 

نایاب

لائبریرین
سبحان اللہ
لفظ لفظ میں جیسے "نطق حقیقی " کی لے پر قلب رقص کناں ہے ۔
حدِ روح الامینی سے بھی ماوراء ، تیری محشر خرامی ہے معجز نما
اے گلستانِ وحدت کے سروِ رواں ، تجھ سا کوئی کہاں تجھ سا کوئی کہاں​
صلی اللہ علیہ و آلہ وسلم
کیا ہی روشن مہکتی نعت کہی ہے محترم شاکرالقادری بھائی
 

شاکرالقادری

لائبریرین
نایاب بھائی ! بہت شکریہ اتنی محبت بھری داد کے لیے ۔۔۔ اس میں مجھ ناچیز کا کوئی کمال نہیں بس یہ انہی کا کرم ہے بقول اعظم چشتی
نعت کا رنگ جو بدلا تو میں سمجھا اعظم
پہلے کہتا تھا میں، اب کوئی کہلواتا ہے
========
 

سید زبیر

محفلین
قائدِ انس و جاں ، خسروِ خشک و تر ، رہبرانِ امم تیرے دریوزہ گر
تیرا ہر نقشِ پا نورِدیدہ وراں ، تجھ سا کوئی کہاں تجھ سا کوئی کہاں
بہت خوبصورت کلام
جزاک اللہ
الف نظامی صاحب شاکر القادری صاحب۔

 

الف نظامی

لائبریرین
محمد وارث، محمد یعقوب آسی: براہ کرم دیکھ لیجیے کہ کیا تقطیع درست ہے؟

سرورِ سروراں فخرِ کون و مکاں ، تجھ سا کوئی کہاں تجھ سا کوئی کہاں
سَر2 وَ1 رے2 سر2 وَ1 را 2 ، فخ2 رِ1 کو2 نو2 م 1 کا2 ،تج2 سَ 1 کو2 ئی1 کہا2 ، تج2 سَ1 کو2 ئی1 کہا2​
212 212 212 212​
فاعلن فاعلن فاعلن فاعلن​
 
تیری رحمت عداوت فراموش ہے ، تو عطا پاش ہے تو خطا پوش ہے
دشمنِ جاں کو بھی تو نے بخشی اماں ، تجھ سا کوئی کہاں تجھ سا کوئی کہاں
بے شک حضور کی ذات سراپا رحمت ہے اور یہ صفات آپ ذات کا خاصہ ہیں:
رحمتی وسعت کل شیء
وما ارسلناک الا رحمۃ اللعالمین​
وہ جسے تیرا آئین مرغوب ہے ، کب وہ تہذیبِ حاضر سے مرعوب ہے
تیری سیرت تمدن کی روحِ رواں ، تجھ سا کوئی کہاں تجھ سا کوئی کہاں
واہ سبحان اللہ، یہ حضور نبی مکرمﷺ کا دیا ہوا آئیں ہی ہے۔تمدن آفریں خلاق آئین جہاں داری​
۔۔۔لیظھرہ علی الدین کلہ ولو کرہ المشرکون​
لقد کان لکم فی رسول اللہ اسوۃ حسنۃ​
بہت شکریہ شاکرالقادری صاحب اور الف نظامی صاحب​
 

محمد وارث

لائبریرین
محمد وارث، محمد یعقوب آسی: براہ کرم دیکھ لیجیے کہ کیا تقطیع درست ہے؟

سرورِ سروراں فخرِ کون و مکاں ، تجھ سا کوئی کہاں تجھ سا کوئی کہاں
سَر2 وَ1 رے2 سر2 وَ1 را 2 ، فخ2 رِ1 کو2 نو2 م 1 کا2 ،تج2 سَ 1 کو2 ئی1 کہا2 ، تج2 سَ1 کو2 ئی1 کہا2​
212 212 212 212​
فاعلن فاعلن فاعلن فاعلن​

جی تقطیع درست ہے۔ بحر متدارک مثمن مضاعف ہے یعنی دوچند یعنی ڈبل یعنی ایک مصرعے میں فاعلن آٹھ بار

فاعلن فاعلن فاعلن فاعلن فاعلن فاعلن فاعلن فاعلن
 
Top