ذوق رکھتا بہر قدم ہے وہ یہ ہوش نقشِ پا

[سید شہزاد ناصر]

رکھتا بہر قدم ہے وہ یہ ہوش نقشِ پا
ہو خاکِ عاشقاں نہ ہم آغوش نقشِ پا

اُفتادگاں کو بے سرو ساماں نہ جانیو
دامانِ خاک ہوتا ہے روپوشِ نقشِ پا

اعجاز پا سے تیرے عجب کیا کہ راہ میں
بول اُٹھے منھ سے ہر لب خاموش نقشِ پا

اس رو گذر میں کس کو ہوئی فرصت مقام
بیٹھے ہے نقش و پا یہ سر دوش نقشِ پا

جسمِ نزار خاک نشینان کوئے عشق
یوں ہے زمیں پہ جیسے تن و توشِ نقشِ پا

فیض برہنہ پائی مجنوں سے دشت میں
ہر آبلہ بنے ہے دُرِ گوشِ نقشِ پا

پابوس درکنار کہ اپنی تو خاک بھی
پہونچی نہ ذوقؔ اس کے بہ آغوشِ نقشِ پا​

 

[طارق شاہ]

بہت خوب شیئرنگ !
میرے پاس (دیوانِ ذوق طبع اوَل مرتبہ "ویران" ظہیر انور میں) مطلع کا پہلا مصرع مختلف ہے
"ہر گام پر رکھے ہے ، وہ یہ ہوشِ نقشِ پا"

آپ کے بالا شیئر کردہ مصرع :
"رکھتا بہر قدم ہے وہ یہ ہوشِ نقشِ پا "
نہایت فصیح اور بہت راست اور مربوُط ہے
اور یقیناََ بعد کی مطبو ع سے لیا گیا ہے ، جو درست کردہ ہے
بہت نوازش شیئر کرنے پر
۔۔۔۔۔۔

اس رو گذر میں کس کو ہوئی فرصتِ مقام
بیٹھے ہے نقش و پا یہ سر دوش نقشِ پا

بالا شعر کے دوسرے مصرع میں بجائے "بہ"
کے "یہ" ٹائپ ہوگیا ہے ، اور نقش و پا بھی نقشِ پا ہے
پہلا مصرع میں بھی رہ گُزر، رو گزر ٹا ئپ ہوگیا ہے

درست شعر یوں ہے :
اُس رہ گُزر میں کِس کو ہُوئی فُرصتِ مَقام !
بیٹھے ہے نقش ِ پا بہ سَرِ دوشِ نقشِ پا
۔۔۔
شکریہ ایک بار پھر سے

رکھتا بہر قدم ہے، وہ یہ ہوشِ نقشِ پا
ہو خاکِ عاشقاں نہ ، ہم آغوشِ نقشِ پا

اُفتادگاں کو بے سرو ساماں نہ جانیو !
دامانِ خاک ہوتا ہے، رُوپوشِ نقشِ پا

اعجاز پا سے تیرے عجب کیا ،کہ راہ میں !
بول اُٹّھے مُنہ سے ہر لَبِ خاموش ِنقشِ پا

اُس رہ گُزر میں کِس کو ہُوئی فُرصَتِ مَقام
بیٹھے ہے نقشِ پا ، بہ سَر ِدَوشِ نقشِ پا

جِسمِ نزارِخاکِ نشینانِ کوُئے عِشق
یُوں ہے زمیں پہ، جیسے تن و توشِ نقشِ پا

فیضِ بَرَہنہ پائی ِمجنوُں سے، دشت میں !
ہر آبلہ بنے ہے دُرِ گوشِ نقشِ پا

پابوس درکنار ، کہ اپنی تو خاک بھی
پہنچی نہ ذوقؔ! اُس کے بہ آغوشِ نقشِ پا

شیخ محمد ابراہیم ذوؔق

​

 

[سید شہزاد ناصر]

آپ کے بالا شیئر کردہ مصرع :
"رکھتا بہر قدم ہے وہ یہ ہوشِ نقشِ پا "
نہایت فصیح اور بہت راست اور مربوُط ہے
اور یقیناََ بعد کی مطبو ع سے لیا گیا ہے ، جو درست کردہ ہے
بہت نوازش شیئر کرنے پر

پسند کرنے کا شکریہ
یہ میں نے آب حیات سے کاپی کی ہے اس میں اسی طرح لکھا ہوا ہے
سلامت رہیں