مصطفیٰ زیدی دیکھنا اہلِ جنوں، ساعتِ جہد آ پُہنچی ۔ مصطفیٰ زیدی

فرخ منظور

لائبریرین
ساعتِ جہد

دیکھنا اہلِ جنوں، ساعتِ جہد آ پُہنچی
اب کوئی نقش بہ دیوار نہ ہونے پائے

اب کے کُھل جائیں خزانے نفَسِ سوزاں کے
اب کے محرومیِ اظہار نہ ہونے پائے

یہ جو غدّار ہے اپنی ہی صَفِ اوّل میں
غیر کے ہات کی تلوار نہ ہونے پائے

یُوں تو ہے جوہرِ گُفتار بڑا وصف ، مگر
وجہِ بیماریِ کِردار نہ ہونے پائے

ایسے زخموں کی جراحت سے محبّت سیکھو
جن کو مرہم سے سروکار نہ ہونے پائے

دشت میں خُونِ حُسین ابنِ علی بہہ جائے
بیعتِ حاکمِ کُفّار نہ ہونے پائے

یہ نئی نسل اس انداز سے نکلے سرِ رزم
کہ مورّخ کی گنہگار نہ ہونے پائے

(مصطفیٰ زیدی)​
 
آخری تدوین:
Top