دل میں جو ہے محبتِ ناموسِ مصطفی ﷺ
قائم کریں گےحجتِ ناموسِ مصطفی ﷺ
سرمائے کی طلب ہے ، نہ جاہ و جلال کی
دل میں اگر ہے دولتِ ناموسِ مصطفی ﷺ
ایمان کی اَساس یہی ، اصلِ دیں یہی
الفت خدا کی ، الفتِ ناموسِ مصطفی ﷺ
اَسرارِ معرفت کُھلے اس خوش نصیب پر
جس پر کھلی حقیقتِ ناموسِ مصطفی ﷺ
حفظِ وطن کو سربکف ، سینہ سپر رہیں
یہ بھی تو ہے حفاظتِ ناموسِ مصطفی ﷺ
قومی زعیم جتنے ہیں ، ہیں مجتمع یہاں
اس کا سبب ہے نسبتِ ناموسِ مصطفی ﷺ
ہے قوم ان کے فہم و تدبر کی منتظر
جن کو ملی بصیرتِ ناموسِ مصطفی ﷺ
ہم جان وار سکتے ہیں محمود بے خطر
کرتے ہوئے حفاظتِ ناموسِ مصطفی ﷺ
(راجا رشید محمود)
