غزل اچھے افکار ، خیال کی حا مل ہے ۔ آہنگ بھی بہت خوب ہے
کہیں کہیں بستگی خوب ہونے پر بھی خیال کی وضاحت صاف نہیں کر رہی ہے
اپنا خیال لکھ رہا ہوں، ایک مشورہ یا نقطۂ نظر ہی سمجھ کر دیکھئے گا اسے
اصلاح تو جو اس قابل ہیں کر ہی دیں گے
دردِ دل کی تُو وہ دہائی دے
آسماں تک صدا سنائی دے
مطلع کسی حاضر سے کلام لگتا ہے، پھر آسمان تک سنائی کی اسے خبر یا نوید بھی کچھ بھلا نہیں، آسمان کا سُننا ، شنوائی یا قبولیت کے زمرے میں آتا ہے
دردِ دل یوں مرا دہائی دے
ایک جگ کو صداسنائی دے
یا
دردِ دل روز ہی دہائی دے
آسمان کو کہاں سنائی دے
کچھ بھی اس طرح کا کہ جس سے شعرمبہم یا وضاحت طلب نہ ہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہو عطا آنکھ کو نظر ایسی
پار دیوار کے دکھائی دے
اسے بھی
کر عطا آنکھ کو نظر ایسی
پار دیوار کے دکھائی دے
" کر" سے اللہ سے طلب ظاہر ہوتی ہے
یا کچھ یوں کہ:
چشمِ بینا کو دے نظر جس سے!
پار دیوار کے دکھائی دے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رکھ نہ محدود بس زمیں تک ہی
عرش تک بھی ہمیں رسائی دے
"رکھ نہ محدود" سے بے تکلفی یا حجت نظر آتی ہے جو صحیح ہے مگر دوسرے مصرع میں
آپ "ہمیں لکھیں گے تو عجیب لگے گا ، ہمیں کو مجھے کردیں گے
رکھ نہ محدود بس زمیں تک ہی
عرش تک بھی مجھے رسائی دے
تو بہتر ہوگا اگر اجتماعی خیال ہے تو ہم کو لانا ہوگا
رکھ نہ محدود بس زمیں تک ہی
ہم کو تُو عرش تک رسائی دے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میں نے مانگا ہے بس سکونِ دل
کب کہا ہے کہ تُو خدائی دے
میں نے مانگا ہے بس سکوں دل کا
کب یہ چاہا کہ تو خدائی دے
صحیح رہے گا ،کہ مانگنا اور چاہنا، دعائیہ ہے جب کے کب کہا تحمکانہ
---------------------------
باقی کے اشعار مفہوم اور معنویت میں صحیح ہیں، بہتری ہمیشہ ہی ممکن ہے
راجہ صاحب بہت خوش رہیں
امید ہے میری باتوں کو صرف ایک مشورہ اور برادرانہ خیال ہی تصور کریں گے، اگر متفق ہیں تو صحیح ، نہیں تو کوئی بات نہیں
بہت خوش رہیں اور لکھتے رہیں
خیر اندیش طارق
