طارق شاہ

محفلین

غزلِ
داغ دہلوی

وہ زمانہ نظر نہیں آتا
کچھ ٹِھکانا نظر نہیں آتا

جان جاتی دِکھائی دیتی ہے
اُن کا آنا نظر نہیں آتا

عِشق در پردہ پُھونکتا ہے آگ
یہ جَلانا نظر نہیں آتا

اِک زمانہ مری نظر میں رہا
اِک زمانہ نظر نہیں آتا

دِل نے اُس بزم میں بٹھا تو دِیا
اُٹھ کے جانا نظر نہیں آتا

رہیے مُشتاق جلوۂ دِیدار
ہم نے مانا نظر نہیں آتا

لے چلو مجھ کو رہروانِ عدَم
یاں ٹِھکانا نظر نہیں آتا

تم مِلاؤ گے خاک میں ہم کو
دِل مِلانا نظر نہیں آتا

آپ ہی دیکھتے ہیں ہم کو تو
دل کا آنا نظر نہیں آتا

دل ہی پر آرزو لُٹا اے داغ
وہ خزانہ نظر نہیں آتا

داغ دہلوی

 
Top