1. اردو ویب کے سالانہ اخراجات کی مد میں فراخدلانہ تعاون پر احباب کا بے حد شکریہ نیز ہدف کی تکمیل پر مبارکباد۔ مزید تفصیلات ملاحظہ فرمائیں!

    $500.00
    اعلان ختم کریں

ن م راشد حَسَن کوزہ گر (٢) ۔ ن م راشد

فرخ منظور نے 'پسندیدہ کلام' کی ذیل میں اس موضوع کا آغاز کیا، ‏مارچ 11, 2013

  1. فرخ منظور

    فرخ منظور لائبریرین

    مراسلے:
    12,649
    جھنڈا:
    Pakistan
    موڈ:
    Cold
    حَسَن کوزہ گر (٢)

    اے جہاں زاد،
    نشاط اس شبِ بے راہ روی کی
    میں کہاں تک بھولوں؟
    زور ِ مَے تھا، کہ مرے ہاتھ کی لرزش تھی
    کہ اس رات کوئی جام گرا ٹوٹ گیا _____

    تجھے حیرت نہ ہوئی!
    کہ ترے گھر کے دریچوں کے کئ شیشوں پر
    اس سے پہلے کی بھی درزیں تھیں بہت __
    تجھے حیرت نہ ہوئی!

    اے جہاں زاد،
    میں کوزوں کی طرف، اپنے تغاروں کی طرف
    اب جو بغداد سے لوٹا ہوں،
    تو مَیں سوچتا ہوں _____
    سوچتا ہوں: تو مرے سامنے آئینہ رہی
    سر ِ بازار، دریچے میں، سر ِبستر ِ سنجاب کبھی
    تو مرے سامنے آئینہ رہی،
    جس میں کچھ بھی نظر آیا نہ مجھے
    اپنی ہی صورت کے سوا
    اپنی تنہائی ِ جانکاہ کی دہشت کے سوا!
    لکھ رہا ہوں تجھے خط
    اور وہ آئینہ مرے ہاتھ میں ہے
    اِس میں کچھ بھی نظر آتا نہیں
    اب ایک ہی صورت کے سوا!
    لکھ رہا ہوں تجھے خط
    اور مجھے لکھنا بھی کہاں آتا ہے؟
    لوح آئینہ پہ اشکوں کی پھواروں ہی سے
    خط کیوں نہ لکھوں؟

    اے جہاں زاد،
    نشاط اس شبِ بے راہ روی کی
    مجھے پھر لائے گی؟
    وقت کیا چیز ہے تو جانتی ہے؟
    وقت اِک ایسا پتنگا ہے
    جو دیواروں پہ آئینوں پہ،
    پیمانوں پہ شیشوں پہ،
    مرے جام و سبو، میرے تغاروں پہ
    سدا رینگتا ہے

    رینگتے وقت کے مانند کبھی
    لوٹ آئے گا حَسَن کوزہ گر ِ سوختہ جاں بھی شاید!

    اب جو لوٹا ہوں جہاں زاد،
    تو میں سوچتا ہوں:
    شاید اس جھونپڑے کی چھت پہ یہ مکڑی مری محرومی کی___
    جسے تنتی چلی جاتی ہے، وہ جالا تو نہیں ہوں مَیں بھی؟
    یہ سیہ جھونپڑا مَیں جس میں پڑا سوچتا ہوں
    میرے افلاس کے روندے ہوئے اجداد کی
    بس ایک نشانی ہے یہی
    ان کے فن، ان کی معیشت کی کہانی ہے یہی
    مَیں جو لوٹا ہوں تو وہ سوختہ بخت
    آکے مجھے دیکھتی ہے
    دیر تک دیکھتی رہ جاتی ہے
    میرے اس جھونپڑے میں کچھ بھی نہیں ____
    کھیل اِک سادہ محبّت کا
    شب و روز کے اِس بڑھتے ہوئے کھوکلے پن میں جو کبھی
    کھیلتے ہیں
    کبھی رو لیتے ہیں مل کر، کبھی گا لیتے ہیں،
    اور مل کر کبھی ہنس لیتے ہیں
    دل کے جینے کے بہانے کے سوا ___
    حرف سرحد ہیں، جہاں زاد، معانی سرحد
    عشق سرحد ہے، جوانی سرحد
    اشک سرحد ہیں، تبسّم کی روانی سرحد
    دل کے جینے کے بہانے کے سوا اور نہیں ____
    (دردِ محرومی کی،
    تنہائی کی سرحد بھی کہیں ہے کہ نہیں؟)

    میرے اِس جھونپڑے میں کتنی ہی خوشبوئیں ہیں
    جو مرے گرد سدا رینگتی ہیں
    اسی اِک رات کی خوشبو کی طرح رینگتی ہیں ____
    در و دیوار سے لپٹی ہوئی اِس گرد کی خوشبو بھی ہے
    میرے افلاس کی، تنہائی کی،
    یادوں، تمنّاؤں کی خوشبو ئیں بھی،
    پھر بھی اِس جھونپڑے میں کچھ بھی نہیں ___
    یہ مرا جھونپڑا تاریک ہے، گندہ ہے، پراگندہ ہے
    ہاں، کبھی دور درختوں سے پرندوں کے صدا آتی ہے
    کبھی انجیروں کے، زیتونوں کے باغوں کی مہک آتی ہے
    تو مَیں جی اٹھتا ہوں
    تو مَیں کہتا ہوں کہ لو آج نہا کر نکلا!
    ورنہ اِس گھر میں کوئی سیج نہیں، عطر نہیں ہے،
    کوئی پنکھا بھی نہیں،
    تجھے جس عشق کی خو ہے
    مجھے اس عشق کا یارا بھی نہیں!

    تو ہنسے گی، اے جہاں زاد، عجب بات
    کہ جذبات کا حاتم بھی مَیں
    اور اشیا کا پرستار بھی مَیں
    اور ثروت جو نہیں اس کا طلب گار بھی مَیں!
    تو جو ہنستی رہی اس رات تذبذب پہ مرے
    میری دو رنگی پہ پھر سے ہنس دے!
    عشق سے کس نے مگر پایا ہے کچھ اپنے سوا؟
    اے جہاں زاد،
    ہے ہر عشق سوال ایسا کہ عاشق کے سوا
    اس کا نہیں کوئی جواب
    یہی کافی ہے کہ باطن کے صدا گونج اٹھے!

    اے جہاں زاد
    مرے گوشہء باطن کی صدا ہی تھی
    مرے فن کی ٹھٹھرتی ہوئی صدیوں
    کے کنارے گونجی
    تیری آنکھوں کے سمندر کا کنارا ہی تھا
    صدیوں کا کنارا نکلا
    یہ سمندر جو مری ذات کا آئینہ ہے
    یہ سمندر جو مرے کوزوں کے بگڑے ہوئے،
    بنتے ہوئے سیماؤں کا آئینہ ہے
    یہ سمندر جو ہر اِک فن کا
    ہر اِک فن کے پرستار کا
    آئینہ ہے
     
    • زبردست زبردست × 4
    • پسندیدہ پسندیدہ × 2
  2. نایاب

    نایاب لائبریرین

    مراسلے:
    13,422
    جھنڈا:
    Pakistan
    موڈ:
    Goofy
    بہت خوب شراکت
    وقت کیا چیز ہے تو جانتی ہے؟
    وقت اِک ایسا پتنگا ہے
    جو دیواروں پہ آئینوں پہ،
    پیمانوں پہ شیشوں پہ،
    مرے جام و سبو، میرے تغاروں پہ
    سدا رینگتا ہے
     
    • پسندیدہ پسندیدہ × 2
  3. فرخ منظور

    فرخ منظور لائبریرین

    مراسلے:
    12,649
    جھنڈا:
    Pakistan
    موڈ:
    Cold
    بہت شکریہ جناب!
     
  4. سید شہزاد ناصر

    سید شہزاد ناصر محفلین

    مراسلے:
    9,328
    جھنڈا:
    Pakistan
    موڈ:
    Relaxed
    بہت ہی شاہکار اور شاندار نظم
    شریکِ محفل کرنے کا شکریہ
    شاد و آباد رہیں
     
    • دوستانہ دوستانہ × 1
  5. امیداورمحبت

    امیداورمحبت محفلین

    مراسلے:
    3,057
    جھنڈا:
    Pakistan
    موڈ:
    Relaxed
    خوب ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
     
    • پسندیدہ پسندیدہ × 1
  6. فلک شیر

    فلک شیر محفلین

    مراسلے:
    7,345
    جھنڈا:
    Pakistan
    موڈ:
    Shh
    فرخ صاحب، بہت خوب........
     
    • پسندیدہ پسندیدہ × 1
  7. فرخ منظور

    فرخ منظور لائبریرین

    مراسلے:
    12,649
    جھنڈا:
    Pakistan
    موڈ:
    Cold
    بہت عنایت شہزاد صاحب! سلامت رہیے!
     
    • دوستانہ دوستانہ × 1
  8. سید ذیشان

    سید ذیشان محفلین

    مراسلے:
    6,782
    موڈ:
    Asleep
    بہت خوب شراکت!

    ویسے مجھے حسن کوزہ گر نمبر 1 سب سے زیادہ پسند ہے۔ باقی تینوں بھی اچھی ہیں۔
     
    • پسندیدہ پسندیدہ × 1
  9. فرخ منظور

    فرخ منظور لائبریرین

    مراسلے:
    12,649
    جھنڈا:
    Pakistan
    موڈ:
    Cold
    انتخاب کی پذیرائی کے لیے بہت شکریہ!
     
  10. فرخ منظور

    فرخ منظور لائبریرین

    مراسلے:
    12,649
    جھنڈا:
    Pakistan
    موڈ:
    Cold
    انتخاب پسند فرمانے کے لیے بہت شکریہ چیمہ صاحب!
     
  11. فرخ منظور

    فرخ منظور لائبریرین

    مراسلے:
    12,649
    جھنڈا:
    Pakistan
    موڈ:
    Cold
    بہت شکریہ! مجھے بھی حسن کوزہ گر نمبر 1 سب سے زیادہ پسند ہے۔
     
    • پسندیدہ پسندیدہ × 1
  12. چودھری مصطفی

    چودھری مصطفی محفلین

    مراسلے:
    406
    اس نظم کا پس منظر کسی کو معلوم ہو تو شریک کریں، جہاں زاد اور بغداد حقیقی ہیں یا نہیں
     

اس صفحے کی تشہیر