حمد و دُعا

سیدہ شگفتہ

لائبریرین



حمد و دُعا

سُورۃُ الفاتحہ کا منظوم ترجمہ

از

سلیم عبدُاللہ

اللہ کے نامِ پاک سے آغاز ہمارے کاموں کا
بے مثل محبت ہے جس کی، جو رحم و کرم میں ہے یکتا

سب حمد اُسی کو زیبا ہے، وہ رب ہے سارے جہانوں کا
سب سُورج چاند ستارُوں کا، سب جانوں کا بے جانوں کا


بے تھاہ سمندر رَحمت کا ، سَرچشمہ مہر و محبت کا
خالق ہے عمل کی قوت کا ، اور مالک روزِ قیامت کا

ہم بندے تیرے اَے آقا ، تیری ہی عبادت کرتے ہیں
توفیقِ اطاعت ، جوشِ عمل کی تُجھ سے چاہت کرتے ہیں

ہاں راہ دِکھا اُس منزل کی ، جو منزلِ فتح و نصرت ہے
اسلاف نے جس پر چل کر پائی دونوں جہاں کی نعمت ہے

وہ راہ نہ ہو گُمراہوں کی ، جو تیرے غضب میں آئے ہیں
ناکامی اور ہلاکت کے دُکھ درد جنھوں نے پائے ہیں


 

الف نظامی

لائبریرین
کروں نام اللہ سے ابتدا
جو ہے رحم و بخشش میں سب سے بڑا

خدا کو ہی زیبا ہیں سب خوبیاں
جو ہے ایک پروردگارِ جہاں

عدالت کے دن کا ہے مالک وہی
جو دے گا جزا سب کو اعمال کی

تری بندگی کرتے ہیں اے خدا
تجھی سے مدد مانگتے ہیں سدا

دکھا ہم کو یارب رہِ مستقیم
ہمیں راہِ حق پہ چلا اے کریم

تو ان پاک لوگوں کا رستہ دکھا
کہ جن پر سدا فضل تیرا ہوا

نہ ان کی ، ہوا جن پہ نازل غضب
نہ گمراہوں کی رہ دکھا میرے رب

ہماری دعا کر قبول اے خدا
تیرے بن نہیں کوئی سنتا دعا
 

تلمیذ

لائبریرین
راجہ صاحب !

براہ کرم اس دوسرے ترجمے کے خالق کا نام بھی لکھ دیجئے۔

شکریہ
 

سیدہ شگفتہ

لائبریرین


سورہ فاتحہ (منظوم)

از

حاجی امداد اللہ مہاجر مکی

سبھی خوبی سبھی تعریف ہے اللہ کو زیبا
بزرگی ہے اُسی آقائے عالی جاہ کو زیبا

وہ ہے سارے جہانوں کا خُدائے بر تر و بالا
برابر ساری مخلوقات کا ہے پالنے والا

بہت ہی مہرباں ہے وہ بڑا ہی مہرباں ہے وہ
سدا رحمت فشاں رحمت فشاں رحمت فشاں ہے وہ

وہی روزِ قیامت کا اکیلا حکمراں ہوگا
کسی کا مشورہ ہوگا نہ کوئی درمیاں ہوگا

خُداوندا ! ترے آگے ہم اپنا سر جُھکاتے ہیں
تُجھی کو پُوجتے ہیں بس تُجھی سے لو لگاتے ہیں

خُداوندا ! تُجھی سے چاہتے ہیں ہم مددگاری
تُجھے آتی ہے اپنے آرزُو مندوں کی دلداری

دِکھا دے ہم کو سیدھی راہ ، سیدھی راہ پر لے چل
جنہیں تُو نے نوازا ہے انہی کی راہ پر لے چل

نہ ان کی راہ پر لے چل ، خُدائی مار ہے جن پر
تری پھٹکار ہے جن پر ، تری دھتکار ہے جن پر

نہ ان کی راہ پر لے چل ، بھٹک کر رہ گئے ہیں جو
ملمع کی طرح چمکے ، چمک کر رہ گئے ہیں جو


 
Top