مظفر وارثی حمدِ باری تعالیٰ ۔ تصور سے بھی آگے تک در و دیوار کھل جائیں ۔ مظفر وارثی

[فرحت کیانی]

حمدِ باری تعالیٰ

تصور سے بھی آگے تک درو دیوار کُھل جائیں
میری آنکھوں پہ بھی یا رب تیرے اسرار کُھل جائیں

میں تیری رحمتوں کے ہاتھ خود کو بیچنے لگوں
مری تنہائیوں میں عشق کے بازار کُھل جائیں

جوارِ عرشِ اعظم اس قدر مجھ کو عطا کردے
مرے اندر کے غاروں پر ترے انوار کُھل جائیں

اتاروں معرفت کی ناؤ جب تیرے سمندر میں
تو مجھ پر باد بانوں کی طرح منجدھار کُھل جائیں

اندھیروں میں بھی تو اتنا نظر آنے لگے مجھ کو
کہ سناٹے بھی مانندِ لبِ اظہار کُھل جائیں

مرے مالک مرے حرفِ دعا کی لاج رکھ لینا
ملے تو بہ کو رستہ ، بابِ استغفار کُھل جائيں

مظفر وارثی کی اس قدر تجھ تک رسائی ہو
کہ اس کے ذہن پر سب معنیء افکار کُھل جائیں


مظفر وارثی

 

[محمد وارث]

شکریہ فرحت، جزاک اللہ

 

[الف نظامی]

سبحان اللہ۔

 

[فرخ منظور]

بہت ہی خوبصورت حمد ہے - بہت شکریہ فرحت کیانی -

 

[ابو المیزاب اویس]

بہت خوب۔۔

آمین یا رب العلمین

 

[جاسمن]

سبحان اللہ۔
جزاک اللہ۔
خوبصورت ترین اشتراک۔