حالی حقیقت محرمِ اسرار سے پوچھ

[حسان خان]

حقیقت محرمِ اسرار سے پوچھ
مزہ انگور کا مے خوار سے پوچھ

وفا اغیار کی اغیار سے سن
مری الفت در و دیوار سے پوچھ

ہماری آہِ بے تاثیر کا حال
کچھ اپنے دل سے کچھ اغیار سے پوچھ

دلوں میں ڈالتا ذوقِ اسیری
کمندِ گیسوئے خمدار سے پوچھ

دلِ مہجور سے سن لذتِ وصل
نشاطِ عافیت بیمار سے پوچھ

نہیں جز گریۂ غم حاصلِ عشق
ہماری چشمِ دریابار سے پوچھ

نہیں آبِ بقا جز جلوهٔ دوست
کسی لب تشنۂ دیدار سے پوچھ

فریبِ وعدهٔ دلدار کی قدر
شہیدِ خنجرِ انکار سے پوچھ

فغانِ شوق کو مانع نہیں وصل
یہ نکتہ عندلیبِ زار سے پوچھ

تصور میں کیا کرتے ہیں جو ہم
وہ تصویرِ خیالِ یار سے پوچھ

متاعِ بے بہا ہے شعرِ حالی
مری قیمت مری گفتار سے پوچھ

(خواجہ الطاف حسین حالی)

 

[مزمل حسین]

فریبِ وعدهٔ دلدار کی قدر
شہیدِ خنجرِ انکار سے پوچھ
کیا کہنے حالی رحمتہ اللہ علیہ کے
ارسال کرنے کے لیے بہت شکریہ حسان بھائی

 

[محمد وارث]

واہ کیا خوبصورت غزل ہے۔

شکریہ جناب ارسال فرمانے کیلیے۔