طارق شاہ
محفلین
غزلِ
جگر مُراد آبادی
دِل کو کسی کا تابعِ فرماں بنائیے
دُشوارئ حیات کو آساں بنائیے
درماں کو درد، درد کو درماں بنائیے
جس طرح چاہیئے، مجھے حیراں بنائیے
پھر دِل کو محوِ جلوۂ جاناں بنائیے
پھر شامِ غم کو صُبحِ درخشاں بنائیے
پھر کیجئے اُسی رُخِ تاباں سے کسبِ نُور
پھر داغِ دِل کو شمْعِ شبِستاں بنائیے
پھر لِکھئے خطِ شوق میں بیتابئ فِراق
پھر خونِ دِل کو زِینَتِ عُنواں بنائیے
پھر پیکرِ حیات میں بھریئے فنا کا رنگ
پھر جان و دِل کو شُعلہ بداماں بنائیے
منشائے حُسنِ دوست ہے، نِکلیں نہ حسرتیں
سِینہ تمام، کُنجِ شہِیداں بنائیے
آباد اگر نہ دِل ہو، تو برباد کیجیے
گُلشن نہ بن سکے تو بیاباں بنائیے
ایک اِک لہُو کی بُوند میں، بھر لِیجے دردِ عِشق
جتنی رَگیں ہیں سب کو رَگِ جاں بنائیے
دِل کو اُسی نگاہ کے کر دیجیے سُپرد
گلشن بنائیے، نہ بیاباں بنائیے
اُن کی طرف سے دِل پہ جو پڑ جائیں مُشکِلیں
اپنی طرف سے اُن کو نہ آساں بنائیے
برقِ جمالِ یار یہ کہتی ہے، اے جگر !
کون اہل ہوش ہے، کِسے حیراں بنائیے؟
.
جگر مرادآبادی
آخری تدوین:
