انیس جب حرم مقتلِ سرور سے وطن میں آئے - میر انیس (مرثیہ)

[حسان خان]

جب حرم مقتلِ سرور سے وطن میں آئے ​

اشکِ خوں روتے ہوئے رنج و محن میں آئے​

سب سیہ پوش غمِ شاہِ زمن میں آئے​

خاک اڑانے کو خزاں دیدہ چمن میں آئے​

بال تھے چہروں پہ سنبل سے پریشاں سب کے​

مثلِ گل چاک تھے ماتم میں گریباں سب کے​

​

گرد تھا ناقوں کے ساداتِ مدینہ کا ہجوم​

رو کے چلاتے تھے سب 'ہائے امامِ مظلوم'​

سرنگوں آتے تھے سجاد، بلکتے معصوم​

ہاتھ اٹھا کر یہ بیاں کرتی تھی زینب مغموم​

دشت میں سیدِ ابرار کو رو آئے ہم​

اے مدینہ! ترے سردار کو رو آئے ہم​

​

اے مدینہ! متوجہ نہیں ہوتا تُو ادھر​

آئے ہیں حسرت و اندوہ سے ہم خستہ جگر​

ہو کے آگاہ یہ دے احمدِ مرسل کو خبر​

یا نبی! لٹ گیا پردیس میں سادات کا گھر​

داد دیجے کہ بہت بے کس و نادار ہوں میں​

اپنے بھائی کی مصیبت میں گرفتار ہوں میں​

​

رن میں افتادہ ہیں بے گور و کفن اور بے سر​

بھائی مارا گیا، سب ذبح ہوئے خویش و پسر​

چادریں چھن گئیں، قیدی ہوئے ہم خستہ جگر​

لے گئے ہم کو کنیزوں کی طرح بانیِ شر​

شہرِ یثرب کی جو بستی تھی وہ تاراج ہوئی​

آپ کی آل کفن کے لیے محتاج ہوئی​

​

اے محمد کے مدینے! نہیں کیا تو آگاہ؟​

یاں سے جس روز گئے تھے حرمِ شیرِ الٰہ​

بھائی، فرزند، بھتیجے تھے سب اس دن ہمراہ​

آج ان میں سے کوئی ساتھ ہمارے نہیں آہ!​

لختِ دل ہے کوئی، نے راحتِ جاں ہے کوئی​

اب نہ ہے پیر، نہ بچہ، نہ جواں ہے کوئی​

​

امن میں یاں سے گئے، خائف و ترساں آئے​

چادریں بھی نہ رہیں، با سرِ عریاں آئے​

جمع یاں سے گئے اور واں سے پریشاں آئے​

گھر لٹا، قید ہوئے، بے سر و ساماں آئے​

تعزیہ دارِ شہِ یثرب و بطحا ہم ہیں​

سوگوارِ پسرِ حضرتِ زہرا ہم ہیں​

​

خاک اڑاتے ہیں کہ ہم لوگوں کا آقا نہ پھرا​

ہم پھرے پیٹتے روتے ہوئے، مولا نہ پھرا​

وا دریغا! پسرِ حضرتِ زہرا نہ پھرا​

قافلہ لٹ کے پھرا، شاہ ہمارا نہ پھر​

دکھ میں شاکر ہیں ہم، آزار میں صابر ہیں ہم​

اک جہاں روتا ہے جس پر وہ مسافر ہیں ہم​

​

یہ بیاں کرتی ہوئی دور سے با نالہ و آہ​

متصل روضۂ احمد کے جو پہنچی ناگاہ​

دخترِ فاطمہ و لختِ دلِ شیرِ الٰہ​

رو کے چلائی کہ لوٹے گئے ہم یا جداہ!​

چھٹ گیا ہم سے شہنشاہ ہمارا، نانا!​

بے گنہ ذبح ہوا آپ کا پیارا، نانا!​

​

ظلم جو چاہتے تھے حق میں ہمارے جلاد​

وہ کیا ہم پہ، بر آئی بس اب ان سب کی مراد​

گھر کا گھر لوٹ لیا، کرتے رہے ہم فریاد​

زندگی تھی جو بچے قتل سے بے کس سجاد​

کہتے تھے سب کہ اماں یہ بھی نہ اب پائے گا​

خنجرِ ظلم سے سر اس کا بھی کٹ جائے گا​

​

لے گئے لوٹ کے اسباب بھی سب بانیِ شر​

بلوۂ عام میں ہم پیٹتے تھے ننگے سر​

بے ردا بانوئے بے کس کو نکالا باہر​

گوشوارے لیے کُبرا کے، سکینہ کے گہر​

رو کے چلائی تھی، دکھ دیتے ہیں ناری یا رب!​

سن لے اِس وقت میں فریاد ہماری یا رب!​

​

زینبِ خستہ جگر، خواہرِ شاہِ ذی جاہ​

درِ مسجد پہ جو روتی ہوئی پہنچی ناگاہ​

اُس گھڑی اور بھی صدمے سے ہوا حال تباہ​

سر کو ٹکرا کے دلِ زار سے کھینچی اک آہ​

تھا یہ مشکل کہ کلیجے کو وہ خوش خو تھامے​

غش جو آنے لگا، دروازے کے بازو تھامے​

​

دی یہ آواز کہ فریاد ہے یا خیرِ بشر!​

کٹ گیا خنجرِ بے داد سے شبیر کا سر​

لائی ہوں آپ کے پیارے کی شہادت کی خبر​

کیجے اس رختِ مشبک پہ ذرا اٹھ کے نظر​

بھر گیا خون میں افسوس عمامہ، نانا!​

ٹکڑے تیغوں سے ہوا آپ کا جامہ، نانا!​

​

کچھ نہ امت نے کیا پاسِ رسولِ کونین​

یا رسولِ عربی! ذبح ہوا رن میں حسین​

ننگے سر ہم سوئے کوفہ گئے با شیون و شین​

چھپ گیا خاک میں وہ فاطمہ کا نور العین​

قیدِ آفت میں کہیں چین نہ پایا، نانا!​

دربدر آپ کی امت نے پھرایا، نانا!​

​

دیکھتے کاش ہمیں آپ اُن اونٹوں پہ سوار​

جن پہ تھی کوئی عماری، نہ کجاوہ زنہار​

شہر وہ شام کا اور ظلم و ستم کا بازار​

پہنچی بعد اس کے یہ نوبت کہ گئی تا دربار​

بال بکھرا دیے چہروں پہ، یہ پردا ٹھہرا​

ننگے سر دیکھنا لوگوں کا تماشا ٹھہرا​

​

کاش اے فاطمہ تم دیکھتیں ہم سب کو اسیر​

کہ ہر اک شہر میں کس طرح پھرے ہم دلگیر​

دیکھتیں سیدِ سجاد کو با حالِ تغئیر​

طوق پہنے ہوئے اور ہاتھ سے تھامے زنجیر​

منزلوں رنج و مصیبت میں گرفتار رہے​

دن کو خوں بار رہے، راتوں کو بیدار رہے​

​

ہم پہ اے فاطمہ! جو کچھ کہ ہوئے ظلم و ستم​

تم نے اک حصہ بھی دیکھا نہیں وہ درد و الم​

زندہ رکھتا جو سدا تم کو خدائے اکرم​

حشر تک ہم پہ بکا کرتیں بہ صد حسرت و غم​

ٹکڑے ہو جاتا، اگر کوہ پہ آفت پڑتی​

پھٹ کے گرتا، جو فلک پر یہ مصیبت پڑتی​

​

آج اے فاطمہ! ہے روزِ غم و درد و بکا​

دیجے رو رو کے بقیعہ میں حَسَن کو یہ صدا​

اے جگر بندِ نبی، اے حَسَنِ سبز قبا​

کٹ گیا تیغِ ستم سے ترے بھائی کا گلا​

تشنہ لب رن میں امامِ ازلی کو مارا​

فوجِ اعدا نے حسین ابنِ علی کو مارا​

​

کربلا میں ہوئی ضائع ترے بھائی کی عیال​

مل گیا خاک میں وہ حیدرِ کرّار کا لال​

تنِ بے سر کو کیا اہلِ ستم نے پامال​

دفن بھی ہونے نہ دی لاشِ شہِ نیک خصال​

بے کفن رن میں تنِ سبطِ پیمبر رکھا​

سرِ مجروح کو خولی نے سناں پر رکھا​

​

یا حَسَن چھپ گیا آنکھوں سے وہ اللہ کا نور​

یا حَسَن حربوں سے سب جسم تھا بھائی کا چور​

کوئی ایسا نہ ہوا ہو گا غریب و مجبور​

اس کی مظلومی پہ کرتے ہیں فغاں وحش و طیور​

تا بہ مقتل جو بیاباں سے ہوا آتی تھی​

صاف 'مظلوم حسینا' کی صدا آتی تھی​

​

کاش وہ واقعہ تم دیکھتے با دیدۂ تر​

جب ستمگر لیے جاتے تھے ہمیں ننگے سر​

نہ تو برقع، نہ عصابہ تھا، نہ سر پر چادر​

کوئی غم خوار، نہ مونس، نہ انیس و یاور​

ایک عابد تھا سو آہن میں مسلسل تھا وہ​

اہلِ کیں گھوڑوں پہ اسوار تھے، پیدل تھا وہ​

​

(میر انیس)​

(ناقص الآخر)​

​