امیر مینائی تند مے اور ایسے کمسِن کے لیے ۔ امیر مینائی

[فاتح]

کل نذیر بھائی نے امیر مینائی کی مشہور زمانہ غزل "جب سے بلبل تُو نے دو تنکے لیے" ارسال کی تو مجھے خیال آیا کہ اسی زمین میں امیر مینائی کی ایک اور غزل بھی موجود ہے۔ سو وہ غزل بھی پیش ہے:

تند مے اور ایسے کمسِن کے لیے
ساقیا! ہلکی سی لا اِن کے لیے

حور یا رب ہے جو مومن کے لیے
بھیج دے دنیا میں دو دن کے لیے

وائے قسمت وہ بھی کہتے ہیں برا
ہم برے سب سے ہوئے جن کے لیے

پی بھی لے زاہد جوانی میں شراب
عمر بھر ترسے گا اس دن کے لیے

گالیوں میں بھی بتوں کی ہے مزا
اک ہنر بھی عیب ہے ان کے لیے

دختِ رز سی پاک دامن چاہیے
شیخ جی سے پاک باطن کے لیے

کہتے ہیں، چھپنے کی بھی اچھی کہی
پردے میں بیٹھیں گے ہم ان کے لیے

دل کا ضامن تو ترا کیا اعتبار
پہلے اک ضامن ہو ضامن کے لیے

چھاؤنی چھائے گی کیا فوجِ خزاں
صرصر آئی باغ میں تنکے لیے

وصل میں بولے جھٹک کر ہاتھ وہ
پھول پھل سب آج ہیں ان کے لیے

بن سنور کر آرسی دیکھا کیے
سب تکلف تھے یہ ہمسن کے لیے

مجھ سے رخصت ہو مرا عہدِ شباب
یا خدا! رکھنا نہ اُس دن کے لیے

جھاڑتی ہے کون سے گل کی نظر
بلبلیں پھرتی ہیں کیوں تنکے لیے

کھا گئی پیری جوانی کو مری
ہائے تھی یہ رات اس دن کے لیے

بوسہ بازی میں انہیں دھوکے دیے
بے گنے دس بیس دس دن کے لیے

لاش پر غیرت یہ کہتی ہے امیر
آئے تھے دنیا میں اس دن کے لیے
امیر مینائی

دیوان امیر مینائی معروف بہ صنم خانۂ عشق ۔ غزل نمبر 294

 

[ادب دوست]

شکریہ فاتح بھائی،

 

[نایاب]

لاجواب شراکت
بہت دعائیں

 

[باباجی]

واہ بہت خوب فاتح بھائی
امیر مینائی کا اک کلام ہے "پیکر ہستی کو جب مشکوک سا پاتا ہوں میں"
اگر یہ شیئر کر سکیں تو بہت مہربانی ہوگی بھائی

 

[فاتح]

شکریہ فاتح بھائی،

لاجواب شراکت
بہت دعائیں

انتخاب پسند کرنے پر شکریہ

 

[فاتح]

واہ بہت خوب فاتح بھائی
امیر مینائی کا اک کلام ہے "پیکر ہستی کو جب مشکوک سا پاتا ہوں میں"
اگر یہ شیئر کر سکیں تو بہت مہربانی ہوگی بھائی

شکریہ۔
میں دیوان میں تلاش کرتا ہوں آپ کی مطلوبہ غزل۔

 

[محمد تابش صدیقی]

واہ ، بہت عمدہ شراکت۔
میرے دادا مرحوم نے بھی اس زمین میں ایک غزل کہی ہے، پیش کرتا ہوں۔

 

[فاتح]

امیر مینائی کا اک کلام ہے "پیکر ہستی کو جب مشکوک سا پاتا ہوں میں"
اگر یہ شیئر کر سکیں تو بہت مہربانی ہوگی بھائی

میں دیوان میں تلاش کرتا ہوں آپ کی مطلوبہ غزل۔

امیر مینائی کے دو دواوین "صنم خانۂ عشق" اور "مراۃ الغیب" میں تلاش کرنے پر ان میں تو نہیں مل سکی۔ شاید یہ امیر مینائی کا کلام نہ ہو۔

 

[باباجی]

امیر مینائی کے دو دواوین "صنم خانۂ عشق" اور "مراۃ الغیب" میں تلاش کرنے پر ان میں تو نہیں مل سکی۔ شاید یہ امیر مینائی کا کلام نہ ہو۔

دراصل میری نانی اماں اکثر گنگناتی تھی
کہتی تھیں کہ یہ عارفانہ کلام وہ بچپن میں سنا کرتی تھیں
شیخ احمد سرہندیؒ کے مزار کے احاطے میں ایک بزرگ پڑھا کرتے تھے
نانی ان پڑھ سادہ خاتون ہیں انہیں نہیں پتا کہ کس کا کلام ہے
اور میں نے جب سے سنا ہے اس کی تلاش میں ہوں
امیر مینائی کا اسلیئے کہا کہ اس کے آخری مصرعے میں "امیر" آتا ہے تو سوچا شاید ان کا کلام ہو

 

[چودھری مصطفی]

چھٹے شعر کا پہلا مصرعہ کچھ سمجھ نہیں آیا' کیا ٹائپو تو نہیں

 

[ناصر رانا]

چھٹے شعر کا پہلا مصرعہ کچھ سمجھ نہیں آیا' کیا ٹائپو تو نہیں

نہیں بھائی ٹائپو نہیں ہے۔ امیر مینائی نے جابجا اپنے کلام میں دخت رز کا استعارہ استعمال کیا ہے۔ ان کے علاوہ اور بحی بہت سے نامور شعراء نے دخت رز اور دختر رز استعمال کیا ہے جس کے معنی ہیں انگور کی بیل۔

 

[فاتح]

چھٹے شعر کا پہلا مصرعہ کچھ سمجھ نہیں آیا' کیا ٹائپو تو نہیں

دختِ رز سی پاک دامن چاہیے
دخت: دختر یا بیٹی
رز: انگور
دختِ رز: انگور کی بیٹی۔ مجازاً شراب