تمھاری گلیوں میں پھر رہے تھے اسیرِ ِ درد و خراب ِ ہجراں

[ظہیراحمدظہیر]

تمھاری گلیوں میں پھر رہے تھے اسیرِ ِ درد و خراب ِ ہجراں
ملی اجازت تو آگئے پھر حضورِ عشق و جناب ِ ہجراں

وہ ملنے جلنے کی ساری رسمیں دراصل فرقت کے سلسلے تھے
گئے دنوں کی رفاقتوں میں چھپا ہوا تھا سراب ِ ہجراں

مٹے نہیں ہیں حروفِ ظلمت ، ابھی گریزاں ہے صبح ِ برات
ابھی پڑھیں گے کچھ اور بھی ہم دیارِ غم میں کتاب ِ ہجراں​

وفا شعاری کے مرحلوں سے پلٹ کے جب کامیاب آئے
ہوا مقرر نئے سرے سے شکیب ِ دل پر نصاب ِ ہجراں

یہ تیرے میرے لہو کی ساری کثافتوں کو نتھار دے گا
ہماری راہوں کے درمیاں میں رواں دواں ہے جو آب ِ ہجراں

وہ دن بھی تھے کہ مرا تعارف غزال چشموں کے زیب ِ لب تھا
اور آج ان کی ہر انجمن سے ملا ہوا ہے خطاب ِ ہجراں

ہمیں امید ِ جزا ہے اُن سے ، اسی لئے تو ظہیر ہم نے
غزل کے شعروں میں لکھ دیا ہے شمارِ درد و حساب ِ ہجراں

ظہیر احمد ظہیر۔۔۔۔۔۔۔۔۔۔۔۔۔۔ ١٩٩٧
ٹیگ: کاشف اختر سید عاطف علی فاتح محمد تابش صدیقی​

 

[محمد تابش صدیقی]

بہت خوب

وفا شعاری کے مرحلوں سے پلٹ کے جب کامیاب آئے
ہوا مقرر نئے سرے سے شکیب ِ دل پر نصاب ِ ہجراں

ہمیں امید ِ جزا ہے اُن سے ، اسی لئے تو ظہیر ہم نے
غزل کے شعروں میں لکھ دیا ہے شمارِ درد و حساب ِ ہجراں

 

[فاتح]

واہ واہ نظمیت سے بھرپور غزل۔ لطف آ گیا

 

[سید اسد معروف]

واقعی ان اشعار میں بہت موسیقیت ہے۔ انتہائی معذرت کے ساتھ جب جناب خلیل الرحمان صاحب کے آسان عروض والے طریقے پر عمل کیا تو ایک دھن ذہن میں گونج اٹھی۔۔۔۔ زحالِ مستی مکن بہ رنجش بہ حالِ ہجراں ہمارا دِل ہے۔۔

 

[الشفاء]

ملی اجازت تو آگئے پھر حضورِ عشق و جناب ِ ہجراں

واہ۔ کیا کہنے۔۔۔