بوڑھی سوچیں ملیں مجھ کو عزمِ جواں ڈھونڈتے ڈھونڈتے-محمد یعقوب آسی

[فرحان محمد خان]

بوڑھی سوچیں ملیں مجھ کو عزمِ جواں ڈھونڈتے ڈھونڈتے
سر لئے پھر رہا ہوں میں سنگِ گراں ڈھونڈتے ڈھونڈتے

کیا خبر کیسی کیسی بہشتیں نظر میں بسا لائے تھے
مرگئے لوگ شہرِ بلا میں اماں ڈھونڈتے ڈھونڈتے

میرے جذبوں کے بازو بھی لگتا ہے، جیسے کہ شل ہو گئے
سرد لاشوں میں ٹھٹھری ہوئی بجلیاں ڈھونڈتے ڈھونڈتے

یوں خیالوں کی تصویر قرطاس پر کیسے بن جائے گی
لفظ کھو جائیں گے فن کی باریکیاں ڈھونڈتے ڈھونڈتے

ہم سا بے خانماں ہو کسی زنج میں مبتلا کس لئے
اپنا گھر ہی نہ تھا تھک گئیں آندھیاں ڈھونڈتے ڈھونڈتے

لو کسی کوئے بے نام میں جا کے وہ بے خبر کھو گیا
روزناموں میں چھپتی ہوئی سرخیاں ڈھونڈتے ڈھونڈتے

آدمی کیا ہے ، یہ جان لینا تو آسیؔ بڑی بات ہے
سوچ پتھرا گئی رشتہِ جسم و جاں ڈھونڈتے ڈھونڈتے​

محمد یعقوب آسی​

 

[محمد عدنان اکبری نقیبی]

واہ بہت عمدہ ۔زبردست مولانا
یعقوب آسی صاحب کے اللہ کریم درجات بلند فرمائے۔آمین

 

[محمد تابش صدیقی]

بہت عمدہ۔
مطلع اور مقطع کے پہلے مصرع میں کچھ کمی سی ہے۔
مطلع کے پہلے مصرع میں مجھ کو عزمِ جواں ہو گا۔

 

[فرحان محمد خان]

واہ بہت عمدہ ۔زبردست مولانا
یعقوب آسی صاحب کے اللہ کریم درجات بلند فرمائے۔آمین

شکریہ جناب

 

[فرحان محمد خان]

بہت عمدہ۔
مطلع اور مقطع کے پہلے مصرع میں کچھ کمی سی ہے۔
مطلع کے پہلے مصرع میں مجھ کو عزمِ جواں ہو گا۔

سر اب دیکھ لیجئے