مجید امجد بنے یہ زہر ہی وجہِ شفا، جو تو چاہے ۔۔۔۔ مجید امجد

نوید صادق

محفلین
غزل

بنے یہ زہر ہی وجہِ شفا، جو تو چاہے
خرید لوں میں یہ نقلی دوا، جو تو چاہے

یہ زرد پنکھڑیاں، جن پر کہ حرف حرف ہوں میں
ہوائے شام میں مہکیں ذرا، جو تو چاہے

تجھے تو علم ہے کیوں میں نے اس طرح چاہا
جو تو نے یوں نہیں چاہا، تو کیا، جو تو چاہے

جب ایک سانس گھسے، ساتھ ایک نوٹ پسے
نظامِ زر کی حسیں آسیا! جو تو چاہے

بس اک تری ہی شکم سیر روح ہے آزاد
اب اے اسیرِ کمندِ ہوا! جو تو چاہے

ذرا شکوہِ دو عالم کے گنبدوں میں لرز
پھر اُس کے بعد ترا فیصلہ جو تو چاہے

سلام اُن پہ، تہِ تیغ بھی جنھوں نے کہا
جو تیرا حکم، جو تیری رضا، جو تو چاہے

جو تیرے باغ میں مزدوریاں کریں، امجد
کِھلیں وہ پھول بھی اک مرتبہ جو تو چاہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(مجید امجد)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
 

خوشی

محفلین
بنے یہ زہر ہی وجہِ شفا، جو تو چاہے
خرید لوں میں یہ نقلی دوا، جو تو چاہے


واہ بہت خوب یہ شعر تو زبردست ہے

شکریہ نوید صادق جی
 

نایاب

لائبریرین
السلام علیکم
محترم نوید صادق بھائی ۔
" سلام اُن پہ، تہِ تیغ بھی جنھوں نے کہا
جو تیرا حکم، جو تیری رضا، جو تو چاہے
"

مجید امجد جی کے خوبصورت کلام سے نوازنے کا بہت شکریہ
نایاب
 
Top