آؤ کرئیے اپننے پنڈ دیاں گلاں

[موجو]

السلام علیکم
میرا دل کیتا کہ میں اپنے ورگے 2 چار پینڈو ہور لبھاں فیر اونہاں نوں اپنے پنڈ دا حال سناواں شائد کدی بھلے چکے آ وڑن ساڈے پنڈ
پر
ایڈی چھیتی تہانوں چھڈن نئیں لگا جدوں تک تسی وی اپنے پنڈ، گراں، گوٹھ، تے چک بارے کوئی گل بات نئیں دس دے۔
آؤ فیر رل کے یاداں ونڈئیے۔

 

[نایاب]

شاوا وئی شاوا
جی آیاں نوں موجو صیب
میرا آپنا پنڈ تے میرے وڈ وڈھیرے پچھے چھڈ آئے ۔
میں شہراں اچ رلدے پینڈا کٹیا ۔
تانگ سچی سی تے زندگی دا ساتھی اک پنڈ توں لبھیا ۔۔۔
میں اوہی پنڈ ڈیرا لا لیا ۔ جیہڑا پنڈ میرے دلبر دا اے ۔۔۔۔۔
ہن اوہدے ہی گیت گانا واں ۔
تسی سنو گے ۔۔۔۔۔۔۔۔۔۔۔

 

[موجو]

ساڈے پنڈ دا ناں ائے : جرپال
شکرگڑھ توں ظفر وال جاندیاں ججیال موڑ تے اترو تے تانگہ لے کر جرپال پہنچ جاؤ
بسنتر دے کنڈے تے بڑا ای سوہنا پنڈ ائے
اسی بسنتر برساتی نالوں نے آکھدے آں
ساڈے وڈکے گرداس پور توں ایتھے ای آ کے ڈیرے لائے سن ریشم تے کوئلہ ہندوستان لے کے جاندے ہوندے سن ونڈاں پین تو پیلاں ای دادا جی تے اونہاں دے پائی ایتھے آگئے سن۔
ایس پنڈ وچ کشمیری، پنجابی تے گجراتی وی رہندے نے
سرکاری سکول پرائمری، 3 مسیتاں، چھپڑ تے قبرستان دی وی سہولت موجود ائے۔
باقی گیس انساناں کول بڑی وادو ائے
بجلی دا بل وی باقاعدگی نال آندائے
بارڈر دے نیڑے ہون پاروں صرف ٹیلی فون سیٹ دی سہولت ای ملدی ائے
زمین بڑی زرخیز ائے ساریاں ای فصلاں لوگ بیج دے نے۔
بسنترے مجھیاں پھڑن دا اپنا ای سواد ائے میں مچھی پھڑن دی گل کردا پیا واں۔ کوئی ائے امید لے کے نا آجائے کہ مچھی کھانی ائے ۔
سارے دن دے شکار تو بعد سانوں دوواں پراواں نوں کدی مچھی لبھی نئیں سی تے ایس واسطے اسی ایہی سمجھ دے آں تے سارے پنڈ نو سمجھانے آں کہ ہندوستان والیاں نے مچھی کدی اگے آن نئیں دتی۔
اللہ بخشے تایا جی مچھیاں پھڑ لیاندے سن بس ہلے وی اونہاں نال ای گزارا چلائی جانے آں۔

اینہاں بڑا ائے ہن تسی وی دسو

 

[موجو]

نایاب پرا
دس ناں
سجناں دی نگری دا ناں تے لوگ بڑے شوق نال لیندے نیں تو اوتھے دی اک اک شے نوں یاد کردے نے۔

 

[شمشاد]

ودیا جی ودیا۔

اپنا پنڈ وی تہاڈے پنڈ دے کول کر کے ای اے۔

ضلع نارووال تے پنڈ اے کھوکھر
اس پنڈ وچ او ہی سارا کجھ ہیگا جو تہاڈے پنڈ وچ اے، پر اے دریا کولوں تھوڑا دور اے۔
باقی مسیتاں، قبرستان، چھپڑ سارے پنڈاں وچ ای ہوندے نے۔

پنڈ وچوں نکلیاں کئی سال ہو گئے نے، ہُن تے کدے ورے دو ورے بعد پھیرا لگدا اے۔

پر اک گل آکھاں گا کہ پنڈ دی کوئی ریس نئیں۔ پنڈ پنڈ ای اے۔ خاص کر گرمیاں وچ، کھو دے کنڈے درختاں دی چھاں وچ منجھی ڈا کے سون دا اپنا ای مزہ اے۔

گلاں تے بڑیاں نے، پر ہُن دوجیاں نوں وی موقع دینا چائیدا اے۔

 

[عمر سیف]

سیالکوٹ ہیڈمرالہ روڈ تے واقع پنڈ ” کوٹلی لوہاراں” توں میرا تعلق اے ۔۔

 

[شمشاد]

کوٹلی دے اک بڑے وڈے عالم ہوئے نے، بڑی ہی ڈاڈی تقریر کر دے ہوندے سن۔ مینوں اونہاں دا ناں نئیں یاد آ رہیا۔

 

[عمر سیف]

کوٹلی دے اِک عالم تھے مولوی بشیر صاب سن، انہاں دے والد وی عالم سن ۔۔ناں میرے ذین اچ نئی
حافظ مسعود احمد سلفی وی اوتھوں دے وڈے عالم نے۔ ہُن تسُی کیہڑیاں دی گَل کر رے او ؟؟

 

[محب علوی]

پنجابی جے گلاں کرن نوں جی تے بوہت کردا اے پر لکھن وچ واوا اوکھی ہو جاندی اے۔

 

[موجو]

پا شمشاد نیڑے ای اپڑے گئے جے
میری اک پھوبھی سہارن رہندی ائے۔ سہارن دے نال ای کالا قادر (فیض احمد فیض دا پنڈ) ائے
تے دوجی پھوپھی عینووال رہندی سی ہن تے اللہ نوں پیاری ہوگئی ائے
ہن تے اک عرصہ ای ہوگیا پنڈ گیاں۔
6 سال پہلے دا گیا ہویاں اوس ویلے شکرگڑھ دے ہوراں پنڈا وچ وی اپنے رشتے داروں نوں ملن گیا ساں

 

[شمشاد]

کوٹلی دے اِک عالم تھے مولوی بشیر صاب سن، انہاں دے والد وی عالم سن ۔۔ناں میرے ذین اچ نئی
حافظ مسعود احمد سلفی وی اوتھوں دے وڈے عالم نے۔ ہُن تسُی کیہڑیاں دی گَل کر رے او ؟؟

مہربانی جی۔ اونہاں دا ناں مولوی محمد بشیر ای اے۔

 

[شمشاد]

پا شمشاد نیڑے ای اپڑے گئے جے
میری اک پھوبھی سہارن رہندی ائے۔ سہارن دے نال ای کالا قادر (فیض احمد فیض دا پنڈ) ائے
تے دوجی پھوپھی عینووال رہندی سی ہن تے اللہ نوں پیاری ہوگئی ائے
ہن تے اک عرصہ ای ہوگیا پنڈ گیاں۔
6 سال پہلے دا گیا ہویاں اوس ویلے شکرگڑھ دے ہوراں پنڈا وچ وی اپنے رشتے داروں نوں ملن گیا ساں

مینوں وی پنڈ گیاں کوئی تِن ورے تے ہو ای گئے ہون گے۔ ایس واری چھوٹی عید تے چھٹی جان دا پروگرام اے۔ تے ویکھو جے پنڈ دا چکر لگیا تے۔

 

[عمر سیف]

مہربانی جی۔ اونہاں دا ناں مولوی محمد بشیر ای اے۔

مولوی بشیر صاب تے اللہ نوں پیارے ہوگئے کوئی تِن چار سال ہوگئے۔ تُسی کدی کوٹلی چکر لایا اے ؟؟

 

[شمشاد]

انا للہ و انا الیہ راجعون۔

نئیں میں کدی وی کوٹلی نئیں گیا، پر سیالکوٹ کئ واری گیا واں۔

 

[موجو]

اک مولوی بشیر صاحب اسلام آباد وی ہوندے نے
معہد اللغۃ العربیۃ والے
عربی زبان سکھان دیاں کتاباں دے مصنف نے

 

[امیداورمحبت]

سیالکوٹ ہیڈمرالہ روڈ تے واقع پنڈ ” کوٹلی لوہاراں” توں میرا تعلق اے ۔۔

چند سال پہلاں کوٹلی لوہاراں جان دا میرا بھی اتفاق ہوا سی اپنی نانی نال ۔۔۔۔۔۔۔۔۔۔۔۔۔۔۔۔ چنگا پنڈ اے اور لوکیں بھی وڈے مہمان نواز سے ۔۔۔۔۔۔۔۔

 

[شمشاد]

ہر پنڈ دے لوک پروہنے واسطے اڈیکن ہار ہی ہوندے نے۔ پہاویں تُسی کسے وی پنڈ ٹُر جاوو۔

 

[عمر سیف]

چند سال پہلاں کوٹلی لوہاراں جان دا میرا بھی اتفاق ہوا سی اپنی نانی نال ۔۔۔ ۔۔۔ ۔۔۔ ۔۔۔ ۔۔۔ ۔ چنگا پنڈ اے اور لوکیں بھی وڈے مہمان نواز سے ۔۔۔ ۔۔۔ ۔۔

تُسی کہیڑے پیڈ دے او ؟؟
کوٹلی کیناں ول مہمان سو؟؟

 

[امیداورمحبت]

تُسی کہیڑے پیڈ دے او ؟؟
کوٹلی کیناں ول مہمان سو؟؟

میرا تعلق تے کسی پنڈ نال نئی ۔۔ پر تسی سنیا ہوگا مرالہ تو اگے سیدپور نال علاقہ بجوات دا
میرے ننھیال دا تعلق اے اس علاقے نال ۔۔۔۔۔۔۔۔۔۔۔۔۔۔

 

[عمر سیف]

میرا تعلق تے کسی پنڈ نال نئی ۔۔ پر تسی سنیا ہوگا مرالہ تو اگے سیدپور نال علاقہ بجوات دا
میرے ننھیال دا تعلق اے اس علاقے نال ۔۔۔ ۔۔۔ ۔۔۔ ۔۔۔ ۔۔

چوہدری امیر حسین دا علاقہ اے بجوات ۔۔ مشرف دورچ ساڈے پاسے دا ایم این اے ریا اے ۔۔ بارڈر ایریا اے ۔۔