شفیق خلش :::::ہمقدم پھر جو یار ہو جائے:::::: Shafiq-Khalish

طارق شاہ

محفلین
1.jpg

غزل

ہمقدم پھر جو یار ہو جائے
ہر فِضا سازگار ہو جائے

گُل کے دیکھے پہ یاد سے اُس کی!
جی عجب بےقرار ہو جائے

اب بھی خواہش، کہ وہ کسی قیمت
ہم خیال ایک بار ہو جائے

حاصلِ دِید سے حصُول کا ایک
بُھوت سر پر سوار ہو جائے

ایسے چہرے نقاب میں ہی بَھلے
جِن کو دیکھو تو پیار ہوجائے

خامشی خُوب یُوں تکلّم سے!
کیوں کوئی شرمسار ہو جائے

تب کہاں بھائے ایک آنکھ سخی
جب کفایت شعار ہو جائے

غم بھی صُورت وہ یاد آنے پر!
ایک سے بے شُمار ہو جائے

ذِکر کیا اُن عنایتوں کا خلشؔ !
جن سے آنکھ اشکبار ہوجائے

شفیق خلشؔ

 
Top