ہر گھڑی اے میرے مالک! تیری کرتے ہیں ثنا (ذو بحرین حمد)

[محمد اسامہ سَرسَری]

ہر گھڑی میرے خدا! کرتے ہیں سب تیری ثنا
انس و جن ، شمس و قمر ، حور و ملک ، ارض و سما

بحر و بر ، شاخ و شجر ، برگ و ثمر ، لطف و مزہ
جسم و جاں ، دست و قدم ، قلب و نظر ، نور و ضیا

تو جمیل اور ہے پسندیدہ تجھے حسن و جمال
خالقِ خوشبوئے گل ، رنگِ چمن ، بادِ صبا!

میں ہوں اے میرے خدا! ، بندہ تیرا ، بندہ تیرا
تو ہی ہے میرے خدا! ، میرا خدا ، سب کا خدا

تو نے ہی نطقِ زباں ، عجزِ بیاں پیدا کیے
ہے اسامہ کی یہ دو بحری ثنا تیری عطا
​