نظر لکھنوی نعتِ رسولِ مقبولؐ: وہ حسنِ مکمل، پیکرِ الفت، خلقِ مجسم کیا کہیے

دادا مرحوم کا ایک نذرانۂ عقیدت بحضور سرورِ کونینﷺ

وہ حسنِ مکمل، پیکرِ الفت، خلقِ مجسم کیا کہیے
محبوبِ خدا مطلوبِ جہاں وہ ذاتِ مکرم کیا کہیے

وہ صورتِ انور صلِّ علیٰ وہ گیسوئے پُر خم کیا کہیے
اک صبحِ درخشاں کا منظر اک شام کا عالم کیا کہیے

افلاک پہ غلماں حور و ملک اور فرش پہ آدم کیا کہیے
مصروفِ ثنا سب رہتے ہیں سُکّانِ دو عالم کیا کہیے

سرتاجِ نبوت، ختمِ رسل یا ہادی اعظم کیا کہیے
القاب سبھی تو پیارے ہیں حیراں ہوں مقدم کیا کہیے

شاہانِ عرب خاقانِ عجم دارا و کَے و جم کیا کہیے
ہوں روضۂ اقدس پر حاضر سر اپنا کئے خم کیا کہیے

بیداریِ شب در پیشیِ رب وہ سجدۂ پیہم کیا کہیے
امت کے لئے بخشش کی دعا با دیدۂ پُر نم کیا کہیے

بھرپور خزینہ حکمت کا اور نورِ ہدایت کا چشمہ
اترا ہے صحیفہ جو ان پر قرآنِ معظم کیا کہیے

اس شمع کے سارے پروانے توحید کے سارے دیوانے
سب شہرِ مدینہ میں آ کر مل بیٹھے ہیں باہم کیا کہیے

اتنی تو خبر ہے آپ گئے در جلوہ گہِ یزداں لیکن
کیا بندۂ و رب میں بات ہوئی یہ واللہ اعلم کیا کہیے

گنجینۂ حکمت، منبعِ حق سرچشمۂ علمِ بے پایاں
آگاہِ رموزِ سر بستہ وہ عرش کا محرم کیا کہیے

تم ختمِ نبوت صلِّ علیٰ ہم آخرِ امت ہیں واللہ
تا حشر تمہیں تم کیا کہنا تا حشر ہمیں ہم کیا کہیے

محشر میں نظرؔ پر چشمِ کرم اے شافعِ محشر فرمائیں
اعمال کی پرسش ہو جس دم کیا حال ہو اس دم کیا کہیے
٭٭٭

محمد عبد الحمید صدیقی نظرؔ لکھنوی
 
Top