ناصر کاظمی فکر تعمیرِ آشیاں بھی ہے

لاریب مرزا

محفلین
فکر تعمیرِ آشیاں بھی ہے
خوفِ بے مہرئ خزاں بھی ہے

خاک بھی اڑ رہی ہے رستوں میں
آمدِ صبح کا سماں بھی ہے

رنگ بھی اڑ رہا ہے پھولوں کا
غنچہ غنچہ شرر فشاں بھی ہے

اوس بھی ہے کہیں کہیں لرزاں
بزمِ انجم دھواں دھواں بھی ہے

کچھ تو موسم بھی ہے خیال انگیز
کچھ طبیعت مری رواں بھی ہے

کچھ ترا حسن بھی ہے ہوش ربا
کچھ مری شوخئ بیاں بھی ہے

ہر نفس شوق بھی ہے منزل کا
ہر قدم یادِ رفتگاں بھی ہے

وجہِ تسکیں بھی ہے خیال اس کا
حد سے بڑھ جائے تو گراں بھی ہے

زندگی جس کے دم سے ہے ناصرؔ
یاد اس کی عذابِ جاں بھی ہے​
 
مدیر کی آخری تدوین:
Top