مومن :::: شوخ کہتا ہے بے حیا جانا -- Momin KhaN Momin

طارق شاہ

محفلین



غزلِ
مومن خاں مومن

شوخ کہتا ہے بے حیا جانا
دیکھو دشمن نے تم کو کیا جانا

شعلۂ دل کو، نازِ تابش ہے
اپنا جلوہ، ذرا دِکھا جانا

شوق نے دورباش اعدا کو
اُس کی محفل میں مرحبا جانا

اُس کے اُٹھتے ہی ہم جہاں سے اُٹھے
کیا قیامت ہے دل کا آ جانا

گھر میں خود رفتگی سے دُھوم مچی
کیونکہ ہو اُس تلک مِرا جانا

پُوچھنا حالِ یار ہے منظور
میں نے نا صح کا مُدّعا جانا

مے نہ اُتری گلے سے، جو اُس بِن
ہم کو یاروں نے پارسا جانا

شکوہ کرتا ہے بے نیازی کا !
تو نے مومن بُتوں کو کیا جانا

مومن خاں مومن




 
آخری تدوین:
Top