شفیق خلش :::::روزو شب دِل کو تخیّل سےلُبھائے رکھنا :::::: Shafiq-Khalish

طارق شاہ

محفلین
1.jpg

غزل
روزو شب دِل کو تخیّل سےلُبھائے رکھنا
ایک صُورت دِلِ وِیراں میں بَسائے رکھنا

خوش تصوّر سے ہر اِک غم کو دبائے رکھنا
کوئی اُمّید، ہمہ وقت لگائے رکھنا

بات سیدھی بھی ، معمّا سا بنائے رکھنا!
دِل کے جذبات کو عادت تھی چھپائے رکھنا

ڈر سے، ظاہر نہ مِرا اِضطراب اُن پر ہو کہیں!
ایک مُسکان سی، چہرے پہ سجائے رکھنا

کر کے آراستہ ہر سُو تِری آمد کے قرینے
ممکنہ راہ پہ، نظروں کو بچھائے رکھنا

عقل کروا بھی چُکی عِشق سے توبہ، لیکن!
دِل کی کوشِش وہی مُشکِل میں پھنسائے رکھنا

کوشِشیں خاک ہُوئیں خود کے ہنسانے کی خلؔش
عہدِ قسمت تھا ہَمَیں یُوں ہی رُلائے رکھنا

شفیق خلشؔ
 
Top