حقیر ذرے کو چاہے تو آسماں کردے - اختر علی خان اختر چھتاروی

کاشفی

محفلین
مناجاب
(اختر علی خان اختر چھتاروی)

حقیر ذرے کو چاہے تو آسماں کردے
تُو بے کراں ہے جسے چاہے بے کراں کردے

عیاں کو پل میں نہاں، اور نہاں، عیاں کردے
اگر تُو چاہے تو پیدا نئے جہاں کردے

تعینات کے منظر کو، بے نشاں کردے
گماں کے سارے مکانات، لامکاں کردے

کرادے میرا تعارف، بطونِ ظاہر سے
دل و نظر کو، "کَماَھِی" کا راز داں کردے

مرے نفس کے شبستانِ لاَ و اِلاَ میں
فروغِ نفی سے بیدار کہکشاں کردے

تمام رازوں کا ہے تُو ہی رازداں، مالک
مرا جو راز ہے، سینے میں ضَو فشاں کردے

ترے ارادے سے جنبش ہو میرے اعضا میں
مرے ارادے کو بے کار و ناتواں کردے

خشوع و شوق بڑھا دے مرا عبادت میں
غلافِ کعبہ سے میری اَنا نہاں کردے

نہاں، نہاں ہے، نہاں کو، نہاں ہی رہنے دے
عیاں جو مجھ سے نہاں ہے، اسے عیاں کردے

کدورتوں سے رہے صاف آئینہ دل کا
غنی بنادے اُسے جو مرا زیاں کردے

بنادے خواجہء ہر دوسرا صلی اللہ علیہ وسلم کا متوالا
درودِ پاک سے جاری دل و زباں کردے

میں مشتِ خاک ہوں مولٰی، اُڑا کے خاک مری
روش روش، مجھے طیبہ میں، جاوداں کردے

ہمارے قلب گناہوں سے ہوگئے پتھر
غفور ہے تُو، انہیں رشکِ پرنیاں کردے

معاف کردے تجھے واسط محمد صلی اللہ علیہ وسلم کا
ہماری ساری خطاؤں کو نیکیاں کردے

جِلا دے، اُمتِ احمد صلی اللہ علیہ وسلم کی فکر سے سینے
ًمخالفوں کے ارادے دھواں دھواں کردے

بحق صدیقِ ابوبکر رضی اللہ عنہ و عدلِ فاروقی رضی اللہ عنہ
ہمارے جذبہء ایماں کو پھر جواں کردے

عطا ہو ہم کو ردائے حیائے عثمانی رضی اللہ عنہ
قوایِ حیدر کرار کرم اللہ وجہ، پاسباں کردے

بنادے مظہر اسم "وَدُود" اُمت کو
روانہ سوئے حرم دل کے کارواں کردے

ہیں تیرے ہاتھ میں پیشانیاں خلائق کی
جدھر تُو چاہے انہیں موڑ کر رواں کردے

فلک پر اور زمیں پر جو تیرے لشکر ہیں
تُو مہرباں ہے، انہیں ہم پہ مہرباں کردے

ترے کرم پہ ہے موقوف عاقبت داور
جسے تُو چاہے اُسے خُلد آشیاں کردے

ترے حبیب صلی اللہ علیہ وسلم کی اُمت ہیں اے رحیم و کریم
کرم سے اپنے ہمیں قابلِ جناں کردے

ہے تُو ہی مالکِ لوح و قلم، علیم و حکیم
جسے تُو چاہے اُسے صاحبِ بیاں کردے

صریرِ خامہء اختر بنے، نوائے سروش
سخن، ہمارے تخیل کا آسماں کردے


munajat.gif

بشکریہ: علیگڑھ اردو کلب
 
Top