غزل برائے اصلاح: اُس کی ہر بات میں ابہام کا پہلو پایا

محترم اساتذہ الف عین
محمد احسن سمیع: راحل
محمد خلیل الرحمٰن
سید عاطف علی
و دیگر اساتذہ کرام_____

آداب

آپ سے اصلاح و رہنمائی کی درخواست ہے__


اُس کی ہر بات میں ابہام کا پہلو پایا
وہ پہیلی ہے جسے بوجھ نہ خسرو پایا

میں نے تحقیر سے جس کیڑے کو دیکھا دن میں
رات میں اُس کو چمکتا ہوا جُگنو پایا

جو بظاہر مجھے لگتا تھا کہ کم بولتا ہے
اُس کو بجتے ہوئے پازیب کا گھنگھرو پایا

مجھ کو گلشن میں کھلے پھول سے کچھ لاگ نہیں
میں ہوں اُس گل کی فدائی جسے خود رو پایا

اوس کی بوند کو نزدیک سے دیکھا جا کر
تو اسے چشمِ سیہ کار کا آنسو پایا

کتنی گمراہی میں ڈوبے ہیں جوانان وطن
اُن کی گمراہی حسیناؤں کا گیسو پایا

جیسے بھٹکے ہوئے آہو کو ٹھکانہ نہ ملے
میں نے یوں خود کو بیابان کا آہو پایا

محمل ابراہیم نے کہا:

اُس کی ہر بات میں ابہام کا پہلو پایا
وہ پہیلی ہے جسے بوجھ نہ خسرو پایا

مزید نمائش کے لیے کلک کریں۔۔۔

ابہام کا پہلو؟؟؟ یہ کوئی چیز نہیں ہوتی. بات میں یا تو ابہام ہوگا، یا نہیں ہوگا.
مزید یہ کہ کس نے پایا؟؟؟ فاعل کا تذکرہ نہیں شعر میں.
ثالثا، پہلو اور خسرو کو قافیہ کیسے لا رہی ہیں آپ؟ خسرو کی و مجہول ہے. یعنی اس میں "رو" کی آواز ویسے ہے جیسے کہ "رونا" میں ہوتی ہے، نہ کہ ویسے جیسے کہ "روح" میں.

محمل ابراہیم نے کہا:

میں نے تحقیر سے جس کیڑے کو دیکھا دن میں
رات میں اُس کو چمکتا ہوا جُگنو پایا

مزید نمائش کے لیے کلک کریں۔۔۔

تحقیر سے نہیں، کسی بھی چیز کو حقارت سے دیکھا جاسکتا ہے. تحقیر کی جاتی ہے.

محمل ابراہیم نے کہا:

جو بظاہر مجھے لگتا تھا کہ کم بولتا ہے
اُس کو بجتے ہوئے پازیب کا گھنگھرو پایا

مزید نمائش کے لیے کلک کریں۔۔۔

بجتی ہوئی پازیب کا گھنگرو بظاہر کم گو کیسے نظر آسکتا ہے؟ عجیب سی بات ہے، مجھے شعر کا مفہوم نہیں سمجھ آیا.

محمل ابراہیم نے کہا:

مجھ کو گلشن میں کھلے پھول سے کچھ لاگ نہیں
میں ہوں اُس گل کی فدائی جسے خود رو پایا

مزید نمائش کے لیے کلک کریں۔۔۔

یہاں بھی مفہوم کچھ گنجلک ہے.
دوسرے مصرعے میں tenses بھی گڑبڑا گئے ہیں. صیغہ حال سے بات شروع ہو کر ماضی میں ختم ہو رہی ہے.

محمل ابراہیم نے کہا:

کتنی گمراہی میں ڈوبے ہیں جوانان وطن
اُن کی گمراہی حسیناؤں کا گیسو پایا

مزید نمائش کے لیے کلک کریں۔۔۔

حسینوں کے گیسو جوانان وطن کی گمراہی کا سبب ہو سکتے ہیں، خود گیسوؤں کو گمراہی کیسے کہا جاسکتا ہے؟؟؟

مزید یہ کہ خسرو کی طرح خود رو میں بھی واو مجہول، یہ چہرے والارو نہیں بلکہ راہ رو والا رو ہے۔
مطلع میں پہلا مصرع مجھے تو قبول ہے۔ فاعل تو فرسٹ پرسن تصور کیا جا سکتا ہے۔

محترم اساتذہ سے نظر ثانی کی درخواست ہے۔۔۔۔۔۔۔


ہم سخن میں نے تُجھے پہلو بہ پہلو پایا
واسطے اپنے تری آنکھ میں آنسو پایا


جس پتنگے کو حقارت سے تھا دیکھا میں نے
رات میں اُس کو چمکتا ہوا جگنو پایا


اُس پری چہرے کی قسمت پہ مجھے رنج ہوا
پاؤں میں اُس کے بندھا میں نے جو گھنگھرو پایا


اوس کی بوند کو نزدیک سے دیکھا جا کر
تو اسے چشمِ سیہ کار کا آنسو پایا

میں جو سوئی تھی کڑی دھوپ میں ہو کر بے دم
آنکھ کھولی تو گھنا سایۂ گیسو پایا


جیسے بھٹکے ہوئے آہو کو ٹھکانہ نہ ملے
میں نے یوں خود کو بیابان کا آہو پایا

اب درست لگ رہی ہے غزل

الف عین نے کہا:

اب درست لگ رہی ہے غزل

مزید نمائش کے لیے کلک کریں۔۔۔

شکریہ