ون دا بوٹا ۔ شریف کنجاہی

تلمیذ

لائبریرین
شریف کنجاہیمرحوم سَن چالی تو سَٹھ ستر دی دہائیاں وچ پنجابی دے سر کڈھویں شاعراں مثلاً پیر فضل گجراتی، ڈاکٹر فقیر، امرتا پریتم، ڈاکٹر موہن سنگھ دیوانہ، احمد راہی، استاد دامن، مولا بخش کشتہ، احمد علی سائیں (تے ہور کئی)اعلی کلام شاعراں دی لڑی وچوں سن۔ شاعری توں اڈ، پنجابی بولی دی تنقید، پرکھ پڑچول (تحقیق)تے تدریس وچ وی اوہناں دا بڑا کم اے۔ پنجابی بولی سِر اوہنا دا دَین اجیہا اے جیہڑا کدے وی لاہن جوگ نئیں۔ ایس لئی پنجاب دے لہندے چڑھدے دونہواں پاسے اونہاں دا ناں بڑے ودھیک مان نال لیا جاندا اے۔
ایہہ دھاگہ (سلسلہ، لڑی)شروع کرن دا مقصد پنجاب دی نویں نسل نوں شریف کنجاہی ہوراں دیاں نظماں راہیں ایہہ باور کروانا اے جے ساہڈی بولی وچ چَھڑیاں جُگتاں تے مخولیہ شاعری ای نئیں، بلکہ ساہڈے وڈے آپنے کلام وچ گُن، گیان تے سیانف دے اوہ سچے موتی رول گئے نیں جنہاں وچ ساہنوں پنجاب دے وسیب دیاں ڈونگھیاں رمزاں لبھدیاں نیں۔ ڈاہڈا دُکھ ہوندا اے، ایہہ سوچ کے پئی نویں زمانے دے لشکارے تے مغرب توں آ وڑن والی اوپری ثقافت کارن ساہڈی نویں نسل آپنے دیسی تے سُچے ریت رواجاں نوں ہولی ہولی بُھلدی جا رئی اے۔ خبرے ایسے نوں ای معاشرتی ارتقاء آکھدے نیں۔
ایتھے میں کدے کدے اونہاں دیاں نویکلیاں نظماں پیش کردارہواں گا جیہڑیاں اونہاں دی کتاب 'جگراتے'وچ شامل نیں۔ (مینوں ایہہ وچار@غدیر زھرا ہوراں دی پوسٹ کیتی ہوئی نظم 'چاننیاں راتاں وچ آؤندا خیال اے'پڑھ کے آیا اے۔)
وَن دا بُوٹا
میں وَن دا سَنگھنا بُوٹا
ٹھنڈیاں میریاں چھاواں
مِٹھیاں میریاں پیلوں
وے توں راہیا جاندیا
بُھکھن بھانیاں ماندیا
آجا جھٹ گھسا لَے
میریاں پیلوں کھا لَے
میری چھاویں بہہ لَے
میں وَن دا سنگھنا بُوٹا
ٹھنڈیاں میریاں چھاواں

کیہہ ہویا پندھ سارا اگے
کیہہ ہویا دن سر توں ڈھلیا
پر انج دُھپے سڑیاں
دُھدل پھکیاں
کُجھ نئیں بندا
اوہوا جَھٹ سہانے
جیہڑے چھاواں ہیٹھ وہانے
ایہہ چھاواں وی چار دیہاڑے
چار دیہاڑے جوبن
مُڑ پَتراں نے جھڑنا
اج آکے بہہ لَے تھلے
میں وَن دا سَنگھنا بُوٹا
ٹھنڈیاں میریاں چھاواں
۔ ۔ ۔ ۔ ۔ ۔ ۔
زبیر مرزا فلک شیر شمشاد نایاب دوست @سیدزبیر نیرنگ خیال بھلکڑ عاطف بٹ پردیسی
 

زبیر مرزا

محفلین
جناب ساڈے نال ایڈا سوہنا کلام ونڈن دی مہربانی
کلام وچ گوہڑیاں حقیقتاں توبڑی خوبی نال بیان کی تا اے شریف کنجاہی نے
 

غدیر زھرا

لائبریرین
مسافر
تیرا پنڈا پوری تُوت دی، تیری لگراں ورگی بانہہ
تیرے بُلھ نیں پھل کریر دے ، تیرا جوبن ون دی چھاں
ایہہ چھاواں سدا نہ رہنیاں ، رہے سدا اوس دا ناں
اسی رب سبّبی گوریے اج آ گئے ایس گراں
اساں جھٹ دوپہر گزارنی ، اساں بوہتا نہیں پڑاں
اساں پنڈ نہ پانے جوگیاں، اساں مَل نہ بہنی تھاں
کس پکے پاکے بیٹھنا ایہہ دنیا اِک سراں
تیرے جوبن وانگوں ، گوریے ! اسی کُل مسافر ہاں

( شریف کنجاہی )
 

تلمیذ

لائبریرین
پڑھی جے ایہہ رمزاں بھری گل بات؟ اج کل کتھوں لبھدیاں نیں ایہہ گلاں!
بہت ودھیا۔ تسی وی نظماں بھیجی جاؤ، میرا کم ہولا کر دتا جے۔ جزاک اللہ!!
کنجاہی ہوران داتعارف تے میں کروا دتا اے۔ ویہل لبھن تے حصہ پاندا رہواں گا۔ (نظم 'مسافر ' وی میں پنج چھ ورہے پہلوںمحفل وچ پوسٹ کیتی سی)
 

نیرنگ خیال

لائبریرین
سبحان اللہ
کلام تے اک پاسے جہیڑا معلومات دی پنڈ کھولی ائے۔۔ اوہدی وکھری چس آئی ائے۔۔۔ جزاک اللہ سرکار۔۔ زبردست
میں شریف کنجاہی صاب دا کلام بوت ائ تھوڑا جناں پڑھیا ائے پر جہیڑا وی ہتھ لگا ائے اوس دا سواد بڑی چیر تکر سر تے چڑھیا ریا ائے۔
ایہہ دھاگہ (سلسلہ، لڑی)شروع کرن دا مقصد پنجاب دی نویں نسل نوں شریف کنجاہی ہوراں دیاں نظماں راہیں ایہہ باور کروانا اے جے ساہڈی بولی وچ چَھڑیاں جُگتاں تے مخولیہ شاعری ای نئیں، بلکہ ساہڈے وڈے آپنے کلام وچ گُن، گیان تے سیانف دے اوہ سچے موتی رول گئے نیں جنہاں وچ ساہنوں پنجاب دے وسیب دیاں ڈونگھیاں رمزاں لبھدیاں نیں۔ ڈاہڈا دُکھ ہوندا اے، ایہہ سوچ کے پئی نویں زمانے دے لشکارے تے مغرب توں آ وڑن والی اوپری ثقافت کارن ساہڈی نویں نسل آپنے دیسی تے سُچے ریت رواجاں نوں ہولی ہولی بُھلدی جا رئی اے۔ خبرے ایسے نوں ای معاشرتی ارتقاء آکھدے نیں۔
بوت ائ ودیا تے عمدہ گل ائے سرکار۔۔۔ واقعی کجھ منچلیاں نیں پنجابی نوں جگتاں دی زبان ای بنا دتا ائے۔ تے لوگ ہن ائے سمجھن لگ پئے نیں کہ پنجابی شید جگت توں وکھ ہوکے بیکار ائے۔۔ حالانکہ سچی تے کھری گل ائے جنج اردو شاعری شراب دے ذکر تو بغیر ادھوری رہندی ائے بالکل اونج پنجابی شاعری عقل تے رمز آلی گل توں بغیر ادھوری ائے۔۔ تسی جیڑے شاعر دا کلام پھرول لئو۔۔۔ تہانوں اک تو ود اک فلسفے دی گٹھ ملے گی۔۔۔۔
 

شمشاد

لائبریرین
کوئی شک نئیں کہ بڑا مزہ آیا اے۔ بوت بوت شکریہ تلمیذ جی۔

تے بھتیجی دے مراسلے دا وی ٹیر سارا شکریہ۔
 

سید زبیر

محفلین
سر تلمیذ ! تہاڈی محبتاں تے شفقتاں دا مقروض آں ، شریف کنجاہی دا تعار ف تے کلام ، ،زبردست
جزاک اللہ،
تے نال بیٹی غدیر زھرا دی شراکت ، اللہ تعالیٰ اودے نصیب بلند کرے بوت ای سوہنا کلام شریک محفل کیتا۔
اساں جھٹ دوپہر گزارنی ، اساں بوہتا نہیں پڑاں
اساں پنڈ نہ پانے جوگیاں، اساں مَل نہ بہنی تھاں
 
Top