طارق شاہ
محفلین
جوشؔ مَلِیح آبادی
پِھر سُوئے عقل، جوشِؔ سُخن داں کب آئے گا
کنعاں کی سمت، یوسفِ کنعاں کب آئے گا
صُبحِ وَطن کے خیمۂ افسُردہ کی طرف
وہ، پائمالِ شامِ غرِیباں کب آئے گا
پِھر نجدِیوں کے دشت سے، یُونانِیوں کی سمت
وہ شاعرِ مُدبِّرِ دَوراں کب آئے گا
سُونی پڑی ہے سَلطَنَتِ عِلم و آگَہی
پِھر اِس طرف، وہ خُسرَوِعِرفاں کب آئے گا
کُچھ تو بَتا، شُعور کی تاریک رَہ گُزار
اِس سمت، پِھر، جُلوسِ چَراغاں کب آئے گا
پِھر کُوئے موشِگافئ اَسرار کی طرف
وہ، نَو اَسِیرِ زُلفِ پَرَیشاں کب آئے گا
بِلقِیسِ ذہن، کب سے ہےمغمُوم و پا بہ گِل
دَوشِ ہَوا پہ، تختِ سُلیماں کب آئے گا
ذرّوں کو بخشتا ہے جو، دستُورِ آفتاب
سُوئے گدائے راہ، وہ سُلطاں، کب آئے گا
تُجھ پر اُتارتا تھا جو،آیاتِ سرو و گُل
اے خاک! وہ رَسولِ بَہاراں کب آئے گا
جِس رِحلِ دِل پہ، مُصحَفِ رُوئے صَنَم ہے آج
اُس پر، دوبارہ ، عقل کا قُرآں کب آئے گا
وہ جوشؔ، درسِ ہوش جو دیتا تھا دہر کو !
خود ہوش میں، وہ مِیرِ دَبِستاں کب آئے گا
جوشؔ مَلِیح آبادی
(شبیر حسن خاں)