دی فری لانسر کا تعارف

ہمارے بارے میں
فری لانسر- بے جا اندیشوں سے بالاتر ہوکر سوچنے کی دعوت

ہم نے قلم کاغذ کو کبھی بریڈ بٹرنہیں بنایا۔
(ولااسئلکم علیہ من اجر)

اور ا ب جب کہ انگلیوں سے روشنی نکلنے لگی ہے اور چھوٹا سا موبائل فون لامحدود بیاضوں میں تبدیل ہوگیا ہے اس کاروبار کی حساسیت اور بڑھ گئی ہے۔ پہلے مہنگا تھا یہ اب بہت سستا ہوگیا ہے۔ جب قلم کاغذ کا دور تھا تو کسی ٹوپی میں آگ لگانے کے لیے ایک عدد ماچس (قلم) اور بہت سے ایندھن (کاغذ) کی ضرورت پڑتی تھی، اب ڈیجیٹل بیاض کا زمانہ آیا ہے تو بڑی سی پگڑی میں بھی اتنی آسانی سے آگ لگ جاتی ہے کہ سوکھے جنگل کی طرح کئی دن تک جلتی رہتی ہے۔

یعنی سہولتیں اب زیادہ ہوگئی ہیں۔ وسائل ہی عام نہیں ہوئے ہیں عزتیں بھی بہت سستی ہوگئی ہیں۔ بنتے دیر لگتی ہے نہ بگڑتے۔ ساری دنیا شیئر بازار ہوگئی ہے، رشتے بھی اب اسی دنیا کے اصول پر جیتے مرتے ہیں۔

فری لانسر جب کاغذ پر چھپتا تھا پڑھا جاتا تھا۔ مضامین کے انتخاب کا معیار ہی ایسا تھا۔

اور اب جب کہ فری لانسر ویب پورٹل بن چکا ہے امید ہے کہ پہلے سے زیادہ پڑھا جائے گا کیونکہ اس کی رسائی رسالے سے کئی گنا زیادہ ہوگی۔ مضامین کے انتخاب کا معیار بھی وہی ہوگا بلکہ آسان وسائل اشاعت کی وجہ سے یہ ذمہ داری اور بڑی ہوگئی ہے۔

بدلتے زمانے کے مطابق فری لانسر کا یہ اسٹیج بدلا ہوا ہے مگر ہم وہی ہیں، ہماری ٹیم وہی ہے، ہمارا نقطہ نظر وہی ہے، ہم دین اسلام کے داعی ہیں، کتاب وسنت کے پرچارک ہیں، ہم سب سے ہم کلام ہوتے ہیں، معاصر زبان میں بات کرتے ہیں، ہم احتیاط کے نام پر جمود وتعطل کو رد کرتے ہیں، ہم بے جا اندیشوں کی بنیاد پر کسی کا رستہ نہیں روکتے ، ہم قابل قدر اقدامات کا اعتراف کرتے ہیں، گراں قدر خدمات کی تعریف کرتے ہیں، جب ضرورت ہو ہم تعدیل کے ساتھ ساتھ جرح (نقد) بھی کرتے ہیں۔اور یہ نقد فری لانسر کامابہ الامتیاز ہے۔ وہ اس طور کہ ہمارے سماج میں تعارف اعتراف سے ہوتا ہوا تعریف تک تو پہنچ جاتا ہے مگر اس سے آگے نہیں بڑھتا۔ اس کلچر کا نتیجہ یہ نکلا ہے کہ ایک ہی موضوع پر کئی کتابوں کی تکرار، ایک ہی خصوصی شمارے میں ایک جیسے کئی مضامین دیکھنے کو ملتے ہیں۔ ایسے اسراف پر کوئی منہ نہیں کھولتا ، زبردستی کھلوایا جائے تو ’’اچھا ہے‘‘ کہہ کر وہ بھی اس جرم میں برابر کا شریک ہوجاتا ہے۔ ہم ایسی بدنظمی پر بات کرنے کو وقت کی بہت بڑی ضرورت سمجھتے ہیں۔

اللہ رب العالمین سے دعا ہے وہ ہمیں درست بات کرنے کی توفیق دے۔آمین
 
آپ کا طرز تحریر اور دی فری لانسر کا تعارف خوب ہے!
اللہ تعالی آپ کے لیے آسانیاں پیدا فرمائیں.

مزید یہ کہ اردو محفل میں خوش آمدید. ہمارا خیال ہے کہ پہلی بار کسی شخص کی بجائے کوئی پورا کا پورا رسالہ محفلین بنا ہے. :)
 
تمام احباب کا مشکور ہوں....
امید کہ فری لانسر کا مطالعہ ضرور کریں گے اور وقتا فوقتا حسن و قبح سے بھی آگاہ کرتے رہیں گے...
 
Top